Carolino hari sa 5th Seminary Fund Run

CEBU, Philippines - Hinay-hinay karon nga mihimo og ngalan si Joebert Carolino isip bag-ong hari sa kalsada sa Cebu running scene human siya mikulit og laing kampiyonato, ning higayuna sa nagmalampusong 5th Seminary Fund Run kagahapon didto sa Seminario Mayor de San Carlos sa Mabolo, ning syudad.

Si Carolino kinsa mao usab ang top placer sa MO Plus Run niadtong miaging Domingo, mao na usab ang migawas nga labing paspas sa 10k men’s class sa oras nga 35:07.76, batok sa kababayan niya sa Davao nga si Elmer Bartolo isip second placer sa oras nga 35:10.640.

Si Riez Enriquez mipuwesto sa ikatulong dapit sa oras nga 36:03.970.

Sa laing bahin, gilupig ni Joeyry Lee (44:00.760) ang beteranang si Madelyn Carter (52:25:760) alang sa titulo sa 10k women’s category. Nagsunod usab sa ikatulong dapit ang kanhi singer ug actress nga si Donna Cruz-Larrazabal sa oras nga 52:31.610.

Ang ABS-CBN TV reporter nga si Vilma Andales (1:13.12.780) mao ang reyna sa 10k Media class, samtang si Fr.Reynante Ravanes maoy midominar sa 10k priest category sa oras nga 51:02.230.