Marquez makigsinumbagay bisan unsang orasa

CEBU, Philippines - Daw giganahan si WBO/WBA lightweight king Juan Manuel Marquez sa padayung paggawas sa iyang pangalan isip usa sa mga kusug nga kandidato nga sangkaon ni Manny Pacquiao sunod tuig.

Bisan paman og pipila nalang ka adlaw sa dili pa ang iyang title defense batok ni Michael Katsidis, nag-alindasay gihapon si Marquez tungod sa ideya nga posibling makuha na niya ang gihandum nga trilogy batok ni Pacquiao.

Dihang gibisita sa boxingscene.com sa iyang training camp didto sa Estados Unidos, si Marquez mibutyag nga nagpanikad na siya nga masugdan ang negosasyon alang sa subli niyang pakigharung sa giilang labing kusgan nga boksidor sa kalibutan.

"I'm ready to fight him, and if necessary I'll do it tomorrow," matud pa ni Marquez. "He is a great fighter but I've already beaten him twice."

Si Marquez nangangkon nga siya maoy angay nga midaog sa rematch nila ni Pacquiao niadtong tuig 2008, human sa kontrobersiyal nga draw sa una nilang sangka niadtong tuig 2004.

Apan sa laing bahin, madugayan pa gyud ang pagpaabot ni Marquez sa kompirmasyon nga sangkaon siya pag-usab ni Pacquiao, kini human gibutyag sa eight-division world champion nga dili usa siya maghisgut og boksing og mupahuway una human sa kadaugan niini batok ni Antonio Margarito.

"We'll take a break, 6 months, so that I won't get bruised," matud pa ni Pacquiao kinsa mobubo una sa iyang atensiyon ngadto sa iyang pamilya ug sa iyang trabaho isip kongresista sa Sarangani Province.