AMBL/ACDC Siteworks abante sa semifinals

CEBU, Philippines - Ang title contender AMBL/ACDC Siteworks Phils ug ang JCI-Mandaue mipalagpot sa ilang tagsa-tagsa ka kaatbang aron moabante ngadto sa semifinals sa JBA second second diha sa City Sports Club-Cebu gym sa Cebu Business Park.

Ang AMBL mikilaw sa undermanned Mang Inasal sa iskor nga 94-83, samtang ang JCI-Mandaue walay kukaluoy nga milubong sa Savers Home Depot, 128-85 pinaagi sa 49 puntos ni Michael Cinco.

Nangigo og maayo gikan sa gawas ang AMBL nga gipangulohan ni ex-UV Lancer Jaymar Canoy, kinsa mipabuto og 22 puntos ug wala na kaayo nila kinahanglana nga mopuntos pa og daghan ang ace point guard nga si Lito Navarro ug ang ilang sentro nga si Chito Hernandez tungod kay lima kanila ang mibahog og double figures.

Si Heintjie Cabo miabuno og 22 puntos alang sa AMBL, samtang ang ilang team manager nga si Allan Lim midugang og 14 puntos. 

Ang team owner nga si Carlos Porras, Jr. maoy nangu sa Mang Inasal sa iyang 24 puntos apan pakyas kini pagdaog tungod sa kakuwang og players.

Sa laing bahin, pito sa siyam ka players sa JCI-Mandaue ang mikutlo og double figures nga gipangulohan nilang Joshua Lerio ug Glenn Cabiluna nga nagkumboya og 43 puntos. (BANATSPORTS)