Ave Maria miluhod sa UV Lancers

CEBU, Philippines - Dili matukib sa pulong ang kalipay sa mga basketball fans sa Carcar dihang ilang nasaksihan ang kulbahinam kaayong sangka tali sa University of the Visayas (UV) Lancers nga gipangulohan nilang ex-pros Stephen Padilla ug Bruce Dacia nga milanat una og double overtime sa wala pa maangkon ang 108-103 nga kadaugan batok sa Ave Maria Sanctuary Park sa opening game sa Open division sa Carcar Mayor’s Cup basketball tournament didto sa Carcar Sports Complex.

Sa 35-above category, ang Matmat Chicharon midaog batok sa CEBECO, 90-84 aron mo-abante ngadto sa quarterfinals, samtang sa SK Inter-barangay division, mi-abante ngadto sa semifinals ang Perelos human ilang gipukan ang Valladolid sa iskor nga 67-53.

Nabiyaan og tres puntos sa nahabiling 16 segundos sa regulasyon, 81-84, ang Lancers mihimo pa og upat ka pagsuway gikan sa three-point area ug ang ikaupat kortesiya ni Stephen Padilla maoy nakatabla, 84-all aron ihatod ang duwa ngadto sa overtime.

Sa gihapon, ang Lancers nabiyaan og dos puntos sa katapusang 48 segundos sa unang overtime, apan si Jayford Rodriguez mitabla sa iskor, 90-all alang sa ikaduhang overtime.

Ang Ave Maria nga gipangulohan ni Jercules Tangkay ug Danny Aying, miabante og singko puntos, 99-94 sa second overtime, apan ang Lancers daling mipapas sa labaw pinaagi sa ilang walo ka sunod-sunod nga puntos sa katapusang 1:10 sa duwa.

Si Rodriguez maoy topscorer sa Lancers uban ang 34 puntos, samtang si Bruce Dacia ug Mark Ababon adunay 20 ug 18 puntos matag usa.

Si Tangkay maoy nangu sa Ave Maria pinaagi sa iyang 25 puntos, si Cainglet miabuno og 16 puntos ug si Jerry Jaca miugkat og 15 puntos.

Puntos Matag Usa

UV (108) - Rodriguez 34, Dacia 20, Ababon 18, Dela Pisa 13, Padilla 11, Luga 10, Elim 2, Diputado 1

Ave Maria (103) - Tangkay 25, Cainglet 16, Jaca 15, France 13, Aying 12, Amores 8, Ocañada 6, Abellana 5, Nuñez 3. – BANAT NEWS