CIW Forwarders milangkat sa open division title

CEBU, Philippines - Mipasulod sa iyang krusyal nga basket ang forward sa M. Lhuillier Kwarta Padala-Cebu Niños nga si Franklin Nailon sa nanghinapos nga bahin sa duwa aron luwason ang CIW Forwarders batok sa Ave Maria Sanctuary Park, 82-79 ug aron usab masakmit ang open division title sa 1st Mayor Teresa P. Alegado Cup Fiesta Basketball League didto sa Consolacion Sports Complex.

Sikit ang sangka tali sa duha ka protagonista ug walay bisan usa kanila ang nakatilaw og double-digit nga labaw.

Gikontrolar sa Ave Maria ni coach Edito Salacut ang first half diin miposte kini og siyete puntos nga labaw, 52-59, apan mibawos og pangataki ang CIW Forwarders aron ilogon ang labaw, 74-69, paingon ngadto sa final period.

Misamot kainit ang duwa human magtabla ang iskor, 79-all sa daginutong oras sa duwa, apan gibuak kini ni Nailon pinaagi sa iyang short-range jumper, samtang si Toong mipasulod og usa ka free-throw nga maoy mikandado sa daog alang sa CIW Forwarders.

Sa nahabiling 24 segundos, may purohan pa unta ang Ave Maria nga maka-overtime, apan nasipyat ang tres ni Jerry Jaca dayong kahurot sa oras.

Si Nailon miposa og 16 puntos, samtang ang iyang teammate sa M. Lhuillier nga si Hafer Mondragon midugang og 14 puntos, apan ang kanhi UV Lancer nga si Jayford Rodriguez maoy topscorer sa Forwarders sa iyang 26 puntos.

Ang ex-PBA pointguard nga si Jercules Tangkay maoy nangulo sa Ave Maria sa iyang 32 puntos, gisundan nila ni Amores ug Aldrin Ocañada nga mi-iskor og 17 ug 14 puntos matag usa.

Ang CIW Forwarders mibulsa og P50,000, samtang ang Ave Maria SP nakadawat og P20,000.

Namugna ang torneyo sa hiniusang puwersa sa Consolacion Municipal Council ubos sa liderato ni Mayor Teresa 'Nene' P. Alegado, Vice Mayor Rey Damole, executive committee chairman Julius Alegado, sports director Engr. Nilo Ferraren, SB members  Nicol Villo, Ben Ermac, Analee Gungob, Brando Cuizon, Alin, ABC president Gelio Maquilan,  SK Federation chairperson Madel Herrera,  league commissioner Paul Alelu Q. Flores ug technical chief Aurelio Eslawan.

Puntos Matag Usa

CIW Forwarders (82) - Rodriguez 26, Nailon 16, Mondragon 14, Toong 8, Zanoria 6, Paradiang 6, Into 3, Caputolan 3

Ave Maria (79) -  Tangkay 32, Amores 17, Ocañada 14, Aying 10, Esperat 3, Canoy 2, France 1. – BANAT NEWS