Super Idols pabiling kampiyon sa IBP tilt

CEBU, Philippines - Napugngan sa defending champion Super Idols ni playing coach Bong Pepito ang mas batan-ong karibal nga Pañeros team diin mi-iskor kini 49-44 nga kadaugan aron magpabiling kampiyon sa Integrated Bar of the Philippines (IBP) 5th Lawyer’s League Mayor’s Cup basketball tournament didto sa Capitol Parish gym sa dalan Escario, ning dakbayan.

Ikatulo na kining higayon nga nakampiyon ang Super Idols sa torneyo sa IBP.

Sa sayo pa, ang Pecandela Law Firm mipilde sa   Litigators, 69-60 aron mopahiluna sa ikatulong puwesto.

Ang Super Idols ug ang Pañeros sikit kaayong nagtakos halos sa kinatibuk-ang duwa ug ang singko puntos nga kadaugan maoy labing daku sa maong duwa. Ang kinadak-ang labaw sa Pañeros mao ang tres puntos sa halftime, 25-22 nga dali sab kaayong gipapas sa Super Idols.

Ang Super Idols wala gihapon mohatag og higayon  hangtod na sa katapusang 47 segundos dihang si Fermin Pepito mipasulod sa iyang short jumper aron hatagan ang iyang koponan og 45-44 nga labaw. Si Benjo Santiago mi-iskor og short jumper aron pagselyo sa kadaugan.

Si Santiago maoy nangu sa Super Idols uban ang 18 puntos. 

Sila si Rowel Juban ug Dennis Aliño mi-iskor og tag 10 puntos alang sa Pañeros.

Sa laing bahin,   sila si Brandon Enad ug Mark Russ Gamallo maoy nangu sa Pecandela sa parehong 12 puntos gisundan ni Francis Pepito nga adunay 11 puntos.

Ang Litigators gipangulohan ni Richard Bauzon, kinsa mibahog og 16 puntos, samtang si Jun Felicitas miamot og 12 puntos. Sila si Edward Sumampong ug Lito Otiz mitampo'g 10 puntos matag usa alang sa Litigators. 

Ang inato nga awarding ceremony gipahigayon sa Park Mall nga gitambongan ni IBP commissioner Bads del Prado. (BANATSPORTS)