Humanity Race sa Red Cross gitakda karong Disyembre 5

CEBU, Philippines - Sa ikatulong higayon, ang Philippine Red Cross-Cebu mopahigayon na usab sa tinuig nilang Humanity Race karong Disyembre 5 diha sa The Terraces sa Ayala Center-Cebu.

Dili aron mosabay sa uso karon nga running, ang mga organizers mopahigayon sa maong lumba dala ang mas dakung katuyoan ug kini mao ang pagpahigayon og fund-raising alang sa labing daku ug karaang humanitarian institution sa kalibotan.

Sa press conference kagahapon didto sa Philippine Red Cross-Cebu headquarters sa Osmeña Blvd., si PRC-Cebu Administrator Norma Tancinco nagkanayon, nga ang lumba mao ang labing dakung fund raising event nga ilang pasiugdahan sa dili pa matapos ang tuig.

Ang salapi nga ilang matigom sa lumba gamitong pundo sa PRC-Cebu sa ilang mga proyekto sama sa mga disaster preparedness, blood program, community health nursing, social services ug youth programs.

Sa iyang bahin, ang miyembro sa board of directors sa PRC-Cebu nga si Paul R. Benemerito malaumon nga mas daghang runners ang modagan isip suporta sa ilang fund raising program.

“Last year nakaabot mi og 800, hope nga karon makuha namo ang among target nga 1,500 plus runners,” matud ni Benemerito.

Gawas sa naandang 10K ug 5K run, gilakip usab sa mga organizers ang 3K fun run alang sa mga beginners, estudyante ug   Red Cross volunteers.

Mokabat ngadto sa P40,000 nga ganting salapi ang nagpaabot sa mga top performers.

Ang registration fee nagkantidad og P250, libre na ang singlet ug snacks. Ang registration forms mahimong makuha diha sa PRC-Cebu headquarters, Runnr sa Ayala ug Philippine Sports Center (PSC). – BANAT NEWS