Canillas delikado ni Laput

CEBU, Philippines - Matubag na unya ang mga pangutana kun hinog na ba si super bantamweight prospect   Larry 'Bon Jovi' Canillas nga matawag nga usa sa mga umaabot nga world title contender sa ALA Gym sa iyang pakigharong sa beteranong si Ramie Laput sa undercard sa AJ Banal-Luis Perez showdown karong Oktubre 30 diha sa Waterfront Cebu City Hotel and Casino.

Dili ikalimod, si Canillas   usa sa mga boksidor sa ALA Gym nga nagbaton og talagsaong kusog. Makita kini sa iyang 13 knockouts sa 15 niya ka daog, apan masuwayan ang iyang abilidad tungod kay usa ka multi-titled si Laput.

Si Canillas katulo na nga midaog niining tuiga, tanan pinaagi sa knockout ug lakip sa iyang mga biktima mao sila si Thai Petch Twins Gym, Fred Sayuni sa Tanzania ug mga Pinoy nga sila si Dexter Mendoza ug Prell Tupas.

Apan lahi ning higayona, tungod kay una kining higayon ni Canillas sa Toledo nga makigsangka og usa ka lig-on ug marunong nga boksidor sama ni Laput, kinsa nagtinguhang mokulit sa ika-24 niya nga sunod-sunod nga daog.

Si Laput mao ang nagkupot sa interim WBO AsPac bantamweight title ug niadtong Disyembre sa miaging tuig, iyang giilog ang WBO Inter-Continental super bantamweight title gikan sa German-based Hungarian nga si Zsolst Bedak. – BANAT NEWS