2 dikit na panalo pakay ng Patriots vs Brunei

MANILA, Philippines - Makadalawang sunod sa Brunei Barracudas ang nais na gawin ng Philippine Patriots sa pagbisita nila sa Brunei Indoor Stadium sa pagpapatuloy ngayon ng AirAsia ASEAN Basketball League (ABL) Season 2.

Ganap na alas-8 ng ga­bi itinakda ang sagupaan na kung saan sisikaping ma­duplika ng bisitang koponan na pag-aari nina Mi­kee Romero at Tony Boy Cojuangco ang 71-62 panalo na naitala noong Oktubre 3 sa Ynares Sports Arena sa Pasig City.

Kung maisakatuparan, palalawigin ng nagdedepensang Patriots ang malinis na karta sa 3-0 bukod sa pagsungkit ng unang pa­nalo sa road game sa season na ito.

Nanguna sa Patriots sa unang pagkikita nila ng Barracudas si Anthony Johnson nang tumipak ito ng 24 puntos at 12 rebounds.

Ngunit sa pagkakataong ito ay hindi magagamit ng koponan ang serbisyo ng 6’6” import dahil patuloy pa rin niyang iniinda ang right hamstring injury na nagresulta rin upang hindi ito makapaglaro laban sa Singapore Slingers na tinalo rin ng Patriots, 62-59.

Si 6’10 Donald Little ang mamumuno sa pagdepen­sa sa shaded area pero mapapadali ang kanyang trabaho kung tutulong ang ibang kasamahan sa pa­ngunguna na ni 6’7 Fil-Am Alex Crisano na gaya ni Orlando Daroya ay maglalaro sa unang pagkakataon.