Mandaue, Carmen Copper abante sa semis

CEBU, Philippines - Miposte og managlahing daog ang team Mandaue ug ang Carmen Copper Corporation (CCC) Builders aron moabante sa crossover semifinals sa Aloguinsan Mayor's Cup Open basketball tournament didto sa Aloguinsan Superdome.

Unang mi-abante ang Mandaue cagers dihang ilang gipalagpot ang Romerica Convenient Store pinaagi sa pag-iskor og 106-103, samtang ang CCC Builders mipukan sa Barili, 101-95 sa usa ka non-bearing game. 

Ang Mandaue ug ang CCC Builders magtakos karong Sabado ug ang modaog maoy makigsangka sa finals batok sa modaog tali sa Barili ug sa Ave Maria Sanctuary Park.

Ang kanhi UV Baby Lancer nga si Ardy Cabañero maoy nangu sa Mandaue dihang miburak siya’g 46 puntos, samtang si Ronan Isidro miamot og 21 puntos.

Sa laing bahin, sila si Turo Canillo ug Elvis Labares nagkumboya og 72 puntos alang sa Aloguinsan-based nga Romerica.

Sa main game, si Jayford Rodriguez maoy nangu sa Builders sa iyang 33 puntos, samtang si Eliud Poligrates   miburak og 30 puntos alang sa Barili.

Ang Aloguinsan Mayor’s Cup gipasiugdahan ni Mayor Augustus Cesar 'Chonne' Moreno ug sa iyang asawa nga si Bise Mayor Cynthia Moreno uban sa suporta sa mga sakop sa municipal council ubos sa pagpangulo sa sports committee chairman nga si Mariolito 'Toto' Biton.

Puntos Matag Usa

Unang duwa:

Mandaue (106-) - Cabañero 46, Isidro 21, Berami 13, Ursal 9, Tabasa 8, Demape 7, Espina 2

Romerica (103) - Canillo 37, Labares 35, Romerica 19, Canedo 4, Cabizal 4, Pugoy 4

Ikaduhang duwa:

Carmen Copper (101) - Rodriguez 33, Ocañada 20, Aguilar 20, Abatayo 14, Arnado 8, Mangyao 6

Barili (95) - Poligrates 30, Delos santos 25, Cruz 20, Ababon 12, Onghio 6, Lumantas 2. – BANAT NEWS