Yellow milubong sa Violet

CEBU, Philippines - Miburak og 25 puntos si Centes Brañanola alang sa Yellow team nga milubong sa team Violet, 101-87 sa Phase 3 Camella Homes Sunday Club basketball tournament didto sa Villas Magallanes gym sa Lapu-Lapu City.

Ang Violet igo lang milabaw og uno punto, 19-20 paghuman sa first period, apan ang Yellow mihimo'g mainitong rally sa sunod kuwarter aron pagbaton og sayes puntos nga bentaha sa halftime, 52-46.

Hinay-hinay nga giinat sa Yellow ang labaw dayon na pagposte og 14 puntos nga kadaugan.

Gawas ni Brañanola, laing upat ka players sa Yellow ang mirehistro og double figures. Si team owner Rolly dela Pieza misansan og 23 puntos, gisundan nilang Rommel Cortes ug Bebot Pleños nga miariya og 21 puntos matag usa ug si Dodong Aparente nga mitikdol og 10 puntos.

Si Alan Sepe milansang og 22 puntos alang sa pilderong Violet, samtang sila si Amay Palad ug Roylan Sumilang nagkumboya og 20 puntos.

Sa laing duwa, ang Rollway Freighters sa pagpangulo ni Ocon mimakmak sa undermanned nga Ryle Trucking, 109-91.

Bisan pa sa ilang kapildihan, ang Ryle Trucking nga aduna lay lima ka players mapasigarbuhon gihapon tungod kay wala kaayo sila malubong og maayo sa Rollway Freighters.

Si Ocon mipabuto og 20 puntos, gisundan ni Allen Diñola sa iyang 13 puntos, sila si Andrino ug Omega miabuno og 12 puntos matag usa.

Puntos Matag Usa

Unang duwa:

YELLOW (101) - Brañanola 25, Dela Pieza 23, Cortes 21, Pleños 21, Aparente 10, Dionzon 2, Almacin 2

VIOLET (87) - Sepe 22, Palad 20, Sumilang 18, Geraldez 11, Balberona 6, Rabi 5, Villapez 4, Maratas 1

Ikaduhang duwa:

ROLLWAY FREIGHTERS (109) - Ocon 20, Diñola 13, Andrino 12, Omega 12, Barel 7, Micabalo 10, Albeos 4, Padilla 4, Lalaguna 2

RYLE TRUCKING (91) - Oyanib 23, Brañanola 22, Delos Angeles 14, Catampatan 12, Palad 11. – BANAT NEWS