Dragons naka-una

CEBU, Philippines - Nagpakita ang Cebu Eastern College (CEC) Dragons nga sila maoy mas preparado   dihang ilang gilubong ang Sacred Heart School-Ateneo de Cebu (SHS-AdC) Magis Eagles, 88-70 kagahapon sa Game-1 sa ilang "best-of-five" championship series sa secondary division sa Cebu Schools Athletic Foundation,Inc. (CESAFI) basketball event diha sa Cebu Coliseum.

Ning pagsuwat, padayon pang nagkumbati ang nine-time champion University of the Visayas (UV) Green Lancers batok sa University of Cebu (UC) Webmasters sa ilang "rematch" alang sa collegiate division title.

Gawas pa nga mas andam ang Dragons, mas balanse sab ang ilang opensa tungod kay upat sa ilang players nga sila si Nike Montalvo, Marvin Bauya, Benjamin James Zosa ug Roy Villarias ang parehong mibahog og 14 puntos.

Bisan pa'g miburak og 22 puntos si Adrian Roland Muller alang sa Magis Eagles, tataw gihapon nga naapektohan siya sa hugot nga depensa sa Dragons tungod kay daghan siya’g sipyat nga tirada sa ilawom.

Wala sab mangigo ang Magis Eagles pagsugod sa third period hinungdan nga ang ilang 38-45 nga biya sa halftime, kalit lang kaayong miburot ngadto sa 17 puntos sa katapusang 1:30 sa maong kuwarter.

Ang Dragons, kinsa inspirado kaayo tungod sa presensiya sa ilang alumni nga si Chester Cokaliong, milabaw og labing menos 22 puntos, 85-63 sa nahabiling 1:07 sa fourth quarter pinaagi sa three-pointer ni Zosa.

Gawas kang Adven Jess Diputado, kinsa miburak og 15 puntos alang sa Magis Eagles, wala sab kaayo’y suporta sa opensa si Muller ug gani si Bradley Bacaltos wala makahimo’g field goals ug ang iyang nakuhang singko puntos pulos gikan sa free throws.

Puntos Matag Usa

CEC (88) - Montalvo 14, Bauya 14, Zosa 14, Villarias 14, Sypongco 10, Sumayang 8, Olayon 8, Abecia 2, Regidor 2, Nuevos 1, Villarosa 1

SHS-Ateneo (70) - Muller 22, Diputoado 15, Abbu 9, Ochea 6, Sing 5, Asilum 5, Cadavis 3. – BANAT NEWS