Line-up sa CCSC-Omega stable

CEBU, Philippines - Nakompleto na ang mga piniling boksidor gikan sa Cebu City Sports Center stable (CCSC) ug Omega Boxing Gym nga maoy morepresentar sa Cebu City alang sa nagsingabot nga Visayas leg sa 2010 ABAP national tournament karong Oktubre 26 diha sa Mandaue City Cultural and Sports Complex.

Sa pagka karon, may 17 na ka mga amateur boxers ang nahagpat nga mosangka ubos sa Team Cebu City Omega nga adunay duha ka teams -- Team A ug Team B.

Ang Team A langkuban sa mga medalists sa miaging 2009 Smart/ABAP boxing championship didto sa Ormoc nga sila si Ardie Boyose, Jack Tepora, Steven Noblefranca, Welmark Dignos, Jared Payao, Ronald Empic ug Ramjess Colina, uban sa mga bag-ong recruits nga sila si Randy Pucdol, Danny Panit, Junnie Saloga-ol, Jordan Catubay.

Molangkob sa Team B mao ang National boxing bronze medalist nga si Alil Ala, Rommel Cruz, Klenn Tacura, Anthon Coral, Mary Kevin Soroño ug Jay Molihon.

Ang Philippine Olympian nga si Efren Tabanas, kinsa maoy miporma sa maong koponan masaligon nga ang Team Cebu City manghawod sa maong torneyo bisan pa sa presensiya sa mga lig-ong koponan sama sa Team Mandaue ug ALA boxing

gym.

Agi'g pagbaid sa ilang talento, ang mga boksidor sa Team Cebu City Omega mopahigayon sa ilang tune-up match karong Oktubre 11 sa “Paboksing sa Barangay” diha sa Barangay Pahina Central Sports Center. (BANATSPORTS)