1st Val2020 Naga Triathlon gitakda

CEBU, Philippines - Matambalan na gyud ang kauhaw sa triathletes human sa dul-an sa usa ka dekada nga pagpaabot tungod kay banhawon ngadto sa habagatang bahin sa Sugbu nunot sa pagpahigayon sa 1st Val2020 Naga Triathlon karong Oktubre 9 diha sa  baywalk sa lungsod sa Naga.

Si Ralph Arche sa Sugbutriathlon, usa sa mga event organizers, miingon atol sa press conference kagahapon diha sa Sandtrap Sports Bar sa Brgy. Banilad, nga ang katapusang aksiyon didto sa habagatan niadto pang 2003 didto sa Sibonga ug sukad niadto wala na kini sundi.

Ang umaabot nga lumba sa Naga naglatid sa sprint ug super sprint distances.

Ang sprint category naglakip sa 19 below, Seniors 20 ug 30, Masters 40 ug 50, Female Open ug Tandem/Relay, samtang sa super sprint naglangkob sa Male ug Female open.

Ang registration fee nagkantidad og P350 alang sa individual categories, samtang P300 matag usa sa tandem/relay. Libre na niini ang souvenir t-shirt, race bib ug snacks.

Alang sa online registration mahimong mobisita sa www.sugbutriathlon.com ug mahimo kini hangtod lang sa Oktubre 8. 

Ganting salapi ug medalya ang madawat sa top finishers sa matag dibisyon. (BANATSPORTS)