Dakung torneyo sa darts

CEBU, Philippines - Nangandam ang mga Sugbuanong darters alang sa sunod-sunod nga mga kompetisyon nga ipahigayon karong Oktubre 2-3 diha sa Baseline Sports and Recreation Center.

Sa dili pa ang mga beterano ug mosulbongay nga darters sa nasud magtigi sa Philippine Open, ang mga kahigalaan ni anhing Dennis Tan, usa sa labing minahal nga darts official dinhi, mopakita sa ilang talento pinaagi sa pagpahigayon og Dennis Tan Memorial Cup karong Oktubre 2.

Ang mga partisipante magsangka sa classified doubles ubos sa best-of-three 501 action sa winners bracket ug one-game 701 match sa losers' bracket.

Human sa doubles action, ang darters, indibidwal nga mopakita sa ilang abilidad sa Visayas leg sa 2010 Philippine Open Singles.

Ang top 8 sa Visayas leg moabante sa national finals sa Oktubre 17 sa kaulohan.

Ang top performers sa finals maoy morepresentar sa nasud alang sa 2011 Ladbrokes.com World Darts Championships sa Alexandra Palace sa London karong Disyembre 16 hangtod sa Enero 3, 2011.

Ganting salapi ug tropeyo ang maangkon nga premyo sa mga mananaog ning duha ka adlaw nga kompetisyon.

Niadtong interesado ning maong torneyo nga gipasiugdahan sa Cebu Darts Association ug sa pagpaluyo sa Terton Craft, ang registration nagkantidad og P200 matag player sa classified doubles ug P400 alang sa Philippine Open singles. – BANAT NEWS