Karon nang gabii San Miguel vs. CESAFI All-Stars
CEBU, Philippines - Sa makausa, ang Sugbuanong Dondon Hontiveros modalit na usab sa iyang katagilungsod og makalingaw nga aksiyon kauban ang San Miguel Beermen sa sunod-sunod nga aksiyon nga sugdan pinaagi sa pakigsangka batok sa CESAFI All-Stars karong alas-7 sa gabii diha sa Cebu Coliseum.
Bisan og usa lamang kini ka exhibition game, si Hontiveros atol sa press conference kagahapon diha sa Vanille sa Ayala Center-Cebu, mibutyag nga ang ilang Sugbuanong fans makalaum og maayong duwa gikan kanila kay ila kining tinud-on aron ma-impress ang ilang bag-ong coach nga si Ato Agustin ug ingon man sa bag-ong coach staff.
Ang pakigsangka nila sa CESAFI All-Stars matawag sab nga sinugdanan sa ilang training ilabi na karon nga adunay dakung kausaban sa koponan.
“Kung sa practice lang namo, hard na kaayo, tinuoron gyud namo sila,” matud pa ni Hontiveros.
Lab-as pa alang sa Beermen ang sakit nilang kapildihan batok sa Alaska Aces sa finals sa miaging PBA Fiesta Cup. “Dissapointed gyud ang management (San Miguel) human mi mapilde sa championship, pero mamawi mi sunod season,” dugang pa ni Hontiveros.
Uban ni Hontiveros nga moduwa karong gabii mao sila si Arwind Santos, Danny Ildefonso, Danny Seigle, Dennis Miranda, Dorian Peña, Jay Washington, Joseph Yeo, Olsen Racela, Mick Pennisi ug ang bag-o nilang point guard nga si Paul Artadi.
Sa ilang bahin, dili usab mo-atras ang CESAFI All-Stars sa pagpangulo ni 6-foot-9 center Junemar Fajardo sa University of Cebu (UC) Webmasters.
Mokompleto sa CESAFI All-Stars mao sila si Harold Cincoflores, Ralf Olivares, Jerome Silva, Rene Saycon, Adrian Lao, Phil Mercader, Eman Calo, Edward Pao, Arrd Evan Django, Rene Pacquiao, Michael Cantonao, Sam Hermosa ug Kurt Amores.
Ugma sa gabii, ang Beermen moduwa batok sa MEPZCEM didto sa Mandaue City Cultural and Sports Complex. – BANAT NEWS
- Latest
- Trending
