CESAFI All-Star Games karon

CEBU, Philippines - Magpasikat karon ang labing masidlakong mga bitoon nga kasamtangan nagpakita og katakus sa nagpadayong 10th season sa Cebu Schools Athletic Foundation, Inc. (CESAFI) atol sa pagpahigayon sa tinuig nga East vs. West All-Star Games sa collegiate ug sa secondary divisions sugod karong ala-1 sa hapon diha sa Cebu Coliseum.

Ang East ni coach Gilbert Demape langkuban sa UV, USJ-R, CIT-U ug USPF, samtang ang West ni coach Mike Reyes bitoonan sa UC, USC, SWU ug DBTC.

Sa naandan, adunay pagahimuon nga three-point shootout, apan walay “slam dunk” contest tungod sa kakulang og partisipante nga mohagit ni defending champion Elwin Durano sa USPF Panthers. 

Gumikan niini, ang slam dunk contest hulipan sa H-O-R-S-E trick game nga masaksihan sa labing unang higayon karong tuiga.

Walo ka collegiate ug siyam ka secondary teams ang moparada sa ilang mga masidlakong bitoon. Matag teams langkuban og 15 ka players.

Ang East sa collegiate division mao sila si Adrian Lao, Harold Cincoflores, Emmanuel Calo, Rene Jun Saycon, Ralf Olivares, Phil Mercader ug Jerome Silva sa nine-time champion UV Green Lancers, Kurt Amores, Edwin Bibera, Abulaiz Suliman ug Anecito Lapiz Jr. sa USJ-R Jaguars, Ellison Rivera ug Fritz Dajalos sa USPF Panthers ug Chester Curso ug Arnel Ipang sa CIT-U Wildcats.

Ang kaatbang gikan sa West langkuban nilang Junemar Fajardo, Kelvin Juliane, Brian Quinton Heruela, Robinson Mohammad ug Krist Edward Pao sa UC Webmasters, Joven Cid Cortes, Nilton John Otida, Mark Gil Panerio, June Michael Cantonao ug Sam Jordan Hermosa sa USC Warriors, Rene Pacquiao, Arrd Evan Diango ug Eleazar Armecin sa SWU Cobras ug Jeffrod Aldave ug Hernando Clarito Jr. sa DTBC Greywolves.

Sa high school division, ang East ni coach Jerry Jaranilla mikuha og unom ka dominanteng players gikan sa Cebu Eastern College (CEC) Dragons nga sila si James Neil Sumayang, Nike Montalvo, Benjamin James Zosa, Roy Villarias, Johnmar Lou Regidor ug Mark Anthony Olayon. Moduwa sila uban nilang Alwin Aguirre, Gerald Legarde, Vincent Mendoza ug Michael Smith sa UV Baby Lancers, Joshua Corcilles, Rommel Diapera ug Richard Paul Gigante sa USPF Baby Panthers ug Clyvin Limalima ug John Anthony Lucena sa CIT-U Wildkittens.

Ang West ni coach Ramel Rasmo moparada og upat ka players gikan sa Sacred Heart School-Ateneo de Cebu (SHS-AdC) Magis Eagles sa ngan nilang Adrian Roland Muller, Adven Jess Diputado, Bradley Brian Bacaltos ug Julius Salvador Cadavis.

Mokompleto sa line-up sa West mao sila si Alvin Labolabo, John Raphael Aranas, Adammne Talisic ug Jerick Gel Yburan sa UC Junior Webmasters, managsuong Renzo ug Rendell Senining ug Nereil Magdali sa USJ-R Baby Jaguars, Harvey Palapar, Francis Dave Guardiario ug Prince Vaughn Malana sa USC Baby Warriors ug Jose Marlo Pono sa DBTC.