Garces mipatigbabaw
CEBU, Philippines - Nakuha ni Kit Ceron Garces sa Sta. Cruz stable ang "majority decision" nga kadaugan batok ni Renato Villamor sa Omega Boxing Gym sa "Paboksing sa Barangay" didto sa Sitio Guneco, Brgy. Guadalupe, ning siyudad.
Si Villamor nakaangkon og pabor sa gidak-on, kinsa agresibo kaayong miatake ni Garces sa una pa lang nga hugna. Apan si Garces wala magpalupig ug mibawos kini pinaagi sa iyang solidong counter-punching nga nakapabarag ni Villamor.
Naluya si Villamor sa round 3 nga nakahatag og higayon ni Garces pagpauwan sa iyang mga kinumo aron masakmit ang daog sa 34 kgs. class.
Apan ang stablemates ni Villamor nga sila si Iran Boyose, Ardie Boyose, Arjay Gonzales ug Rogelio Alcos mihakot og daog alang sa Omega Stable.
Si Iran Boyose midaog pinaagi sa puntos batok ni Joldian Dopalco sa Team Cebu, si Ardie Boyose mi-TKO ni John Michael Masong sa round 2. Si Gonzales midaog pinaagi sa point decision batok ni Jimboy Mayang sa Magdalo stable, samtang si Alcos yano kaayong midaog pinaagi sa pagpaundang ni Alil Ala sa Team Cebu.
Duha ka mga boksidor sa Sanai Stable nga sila si Margarito Moya ug Benjie Manatad ang midaog usab batok sa tagsa-tagsa nila ka mga kaatbang.
Gikulata ni Moya ang taga-Pasil nga si Jumar Nodalo, samtang si Manatad midaog pinaagi sa decision batok ni Rodex Piala.
Si Junriel Jimenez sa Team Cebu midaog sab batok ni Lester Dula sa Sta. Cruz stable pinaagi sa decision.
- Latest
- Trending
