Cebu gitiwasan sa MisOr

CEBU, Philippines - Delikado karon ang sitwasyon sa M. Lhuillier Kwarta Padala-Cebu Niños human kini tiwasi sa MisOr Meteors, 75-71 sa Game-3 sa ilang "best-of-five” finals series sa Tournament of the Philippines didto sa Xavier University gym sa Cagayan de Oro City.

Ang Niños naglaraw nga mamahimong labing unang kampiyon sa hinugpong liga sa Philippine Basketball League (PBL) ug sa Liga Pilipinas.

Ang kanhi UV Lancer nga si Patrick Cabahug mibomba og 23 puntos alang sa Meteors nga nakapabor na karon sa series, 2-1 ug posible nila nga tapuson ang serye sa Game-4, aron malikayan ang deciding game nga anhi ipahigayon sa Cebu Coliseum.

Gibiyaan og uno punto ang Meteors sa first period, 17-18, apan ang mga tirador sa MisOr nga sila si Cabahug ug Reed Friar Juntilla mi-iskor og 10 puntos matag usa aron hatagan ang ilang koponan og nuybe puntos nga labaw sa halftime, 39-30.

Ang Meteors nga walay katagbawan, miinat sa ilang labaw ngadto sa 12 puntos, 62-50, sa third period, apan mibawos ang Niños pinaagi sa paglusad og 16-2 rally aron ilogon ang labaw 66-64, human sa triple ni Bruce Dacia.

Apan sila si Cabahug ug Juntilla mipagawas sa ilang kainit aron angkonon og balik ang labaw, 73-69 sa daginutong oras sa duwa.

May purohan untang makatabla ang Niños ug ihatod ang duwa ngadto sa overtime dihang milabaw lang og tres puntos ang Meteors, 71-74,   apan mikagar ang gibuhiang tres ni Stephen Padilla.

Ang split free throw ni Juntilla maoy mikandado sa kadaugan sa Meteors.