Cobras nakasud sa semis

CEBU, Philippines - Naka-ipsot ang fourth-ranked Southwestern University (SWU) Cobras uban ang 77-75 nga kadaugan batok sa no. 5 qualifier Cebu Institute of Technology-University (CIT-U) Wildcats aron moabante sa semifinals sa 10th Cebu Schools Athletic Foundation Inc. (CESAFI) basketball tournament niadtong Biyernes sa gabii diha sa Cebu Coliseum.

Duwa karon

(Cebu Coliseum)

4:00 pm -- USC vs. USJ-R

 Sa juniors match, ang fourth-seed University of the Visayas (UV) Baby Lancers mitaktak sa University of San Carlos (USC) Baby Warrios, 67-62.

 Naglabaw og 13 puntos pagsugod sa third period, 46-33, ang Cobras naglawig na sa kadaugan kay ilang namintinar ang double figures nga labaw sa kinatibuk-ang kuwarter.

Apan ang Wildcats hinay-hinay nga mikamang sa fourth period diin mihimo kini og 16-7 run aron kibkiban ang labaw, gani nakatabla pa kini, 65-all human sa short jumper ni Jose Allan Dimco sa nahabiling 4:14 sa duwa.

Wala magdugay, si Karen Rick de la Cerna miposa og triple aron hungitan ang Wildcats og tres puntos nga labaw, 68-65, apan     kalit lang usab kining gipapas sa Cobras human si Arrd Evan Diango misukli sab og 3-pointer, 72-71 sa nahabiling 1:22 sa duwa.

Ang Wildcats katapusang milabaw sa iskor nga 73-72 kay ang Cobras mibugwak og upat ka sunod-sunod nga puntos aron makaginhawa og lawom.

Sa naandan, si Diango maoy nakaluwas sa Cobras sa iyang 19 puntos. Sila si Rene Pacquiao ug Eleazar Armecin miamot og 16 puntos matag usa, samtang si Clifford Maguate miabuno og 13 puntos.

Si Arnel Ipang mitusak og 19 puntos alang sa naparot nga Wildcats. Si Chester Curso miamot og 13 puntos, samtang sila si Floyd Taboada ug Dimco parehong mitunol og 12 puntos.

Sa sayo pa, si Vincent Mendoza mi-iskor og 15 puntos aron pangulohan ang Baby Lancers, samtang si Prince Vaughn Malana mao sab ang nangulo sa Baby Warriors pinaagi sa iyang 16 puntos, gisundan nilang Anthony Guy Romaguera ug Arsenio Uy sa ilang 10 puntos matag usa.