CEC Dragons miloblob sa unang dapit

CEBU, Philippines - Hingpit na nga naangkon sa Cebu Eastern College (CEC) Dragons ang unang dapit human sa ilang 52 puntos nga pagmasaker sa Don Bosco Technology Center (DBTC) Junior Greywolves, 115-63 sa ilang pisikal kaayo nga duwa kagahapon sa 10th Cebu Schools Athletic Foundation Inc. (CESAFI) basketball event diha sa Cebu Coliseum.

Pulos gipahamtangan og duha ka "unsportsmanlike" fouls ang duha ka koponan dihang pisikal na kaayo ang duwa pagsugod sa second half nga nakalangay pag-ayo sa third period.

Si Carmel Leix Mellijor sa Don Bosco gipagawas sa korte sa katapusang 13.2 segundos sa third period human gitawgan og duha ka technical fouls dihang iyang gisiko si Lirio Abecia sa CEC nga nakaangkon og gisi sa iyang tuong kilay. Niadtong higayona, ang CEC nakabaton na og makabungog nga labaw, 76-46.

Ang teammate ni Mellijor nga si Dale Emmanuel Belangel gitawgan sab og "unsportsmanlike" foul batok ni Nike Montalvo sa CEC.

Sa habig sa Dragons, sila si James Sumayang ug Luther Nuevos nakahimo sab sa maong kalapasan.

Si Roy Villarias maoy topscorer sa Dragons uban ang 27 puntos, samtang sila si Montalvo ug Benjamin James Zosa nagkumboya og 45 puntos dihang sila ang no. 1 sa elimination round bitbit ang 7-1 nga baraha.

Si Marlo Pono mao lang ang bugtong player sa DBTC nga mihimo'g double figures sa iyang 18 puntos.

Sa sayo pa, ang University of San Carlos (USC) Baby Warriors miinat sa ilang baraha ngadto sa 3-4 human gilubong ang Cebu Institute of Technology-University (CIT-U) Wildkittens sa iskor nga 78-61.

Si Harvey Palapar mihabwa og 18 puntos aron pangulohan ang Baby Warriors, samtang ang Wildkittens, kinsa nagtangag og 3-5 nga baraha sa paghuman sa eliminasyon, gipangulohan ni Clyvin Limalima pinaagi sa iyang 19 puntos. (BANAT NEWS)