Ni Gabby G. Malagar

CEBU, Philippines - Temporaryong gihuptan karon sa University of the Visayas (UV) Baby Lancers ang ikaduhang pwesto human ilang gilubong ang Don Bosco Techology Center (DBTC) Junior Greywolves sa iskor, 91-74 samtang naka-ipsot ang University of Cebu (UC) Junior Webmasters gikan sa mga kamot sa Cebu Institute of Tehnology-University (CIT-U) Wildkittens sa iskor, 82-79 sa duha ka sangka sa high school kagahapon sa nagpadayong 10th Cebu Schools Athletic Foundation, Inc.

Kinahanglan lang modaug ang Baby Lancers batok sa Sacred Heart School-Ateneo de Cebu Magis Eagles aron mailog ang unang pwesto karong Huwebes tungod kay kung magtabla sila sa Cebu Eastern College (CEC) Dragons human sa elimination, sila maoy mahimong no. 1 seed pinaagi sa ilang daog batok Dragons.

Ang Baby Lancers kinsa gipangulohan ni Vincent Mendoza kinsa mibahug og 22 puntos, naghupot karon og 4-1 nga baraha ug biya lang og usa ka daug sa CEC Dragons kinsa temporaryo sab nga naghupot sa unang pwesto sa ilang 5-1 nga baraha.

Sila si Gerald Legarde ug Michael Smith parehong midugang og 18 puntos alang sa Baby Lancers ug si Alwyn Aguirre mitampo og 10 puntos.

Wala mag-agi og kakulba ang Baby Lancers sa ilang duwa tungod kay sila maoy nagkontrolar sa duwa gikan gyud sa pagsugod.

Ang Junior Greywolves kinsa wala pa makatilaw ug daog ug aduna’y 0-7 nga baraha, gipangulohan ni Marlo Pono kinsa miposa og 20 puntos.

Sa laing bahin, nag-agi una’g kulba ang UC Junior Webmasters sa wala pa sila maka-ipsot batok sa Wildkittens. Kanunay unta silang nag-una apan kanunay sab mosikit ang Wildkittens apan maayo na lang kay wala sila magpadala sa presyur hangtod sa kataposang pipila ka gutlo.

Si John Raphael Aranas mihakot og 15 puntos aron pangulohan ang UC juniors kinsa aduna nay 5-2 nga baraha samtang sila si Jeric Yburan ug Rabani Comendador parehong midugang ug 12. (BANAT)