UV vs. UC karong gabii

CEBU, Philippines - Magtakos sa labing unang higayon karon nga season ang nine-time champion University of the Visayas (UV) Green Lancers batok sa ilang higopit nga karibal ug losing finalist sa miaging tuig ang University of Cebu (UC) Webmasters sa usa ka gikahinamang engkwentro karong gabii nga gi-ila sab nga ‘finals preview’ tali sa duha ka kusgan nga higante sa korte diin ang modaug mahimo nang moharus sa elimination round sa nagpadayong 10th Cebu Schools Athletic Foundation, Inc. (CESAFI) didto sa Cebu Coliseum.

Suwayan sab karong gabhiona sa nagsangki-ig nga contender ang University of San Jose Recoletos (USJR) Jaguars sa pagkulit sa labing una nilang daog dihang ilang ikasangka ang Don Bosco Technology (DBTC) Greywolves sa dili pa ang UV-UC main event.

Medyo nakabsan na og panahon ang Jaguars alang sa ilang tuyo o damgo nga moabante sa top 4 tungod sa ilang makapahibulong kaayong 0-4 nga baraha apan ang labing importantre sa tanan mao ang pagdaog ning nagkaduol nang matapos nga elimination.

Sa miaging tuig sa usa ka blockbuster opening game, ang Webmasters nga gipangulohan sa ilang 6-9 nga sentro nga si Junemar Fajardo mibuntog sa Lancers ubos sa pagtimon sa 6-11 nga higanteng si Gregory Slaughter sa iskor, 75-73 sa usa ka kulba-hinam kaayong duwa nga natino lang sa pipila ka nahibiling segundos dihang na-ilog sa gamitoy apan beteranong point guard nga si Kelvin Juliane ang bola nga posible untang maoy maghatag sa Lancers sa ilang kadaogan o labing menos, maghatod sa duwa ngadto sa singko minutos nga overtime.

Tungod lang niadtong maong daog, mi-abante gyud sa finals ang Webmasters ug sila maoy nahimong no. 1 sa elimination sa ilang 6-1 nga baraha ug bisan nagtabla sila sa UV, sila ang nahimong topseed tungod sa simple tie. Karong tuiga, si Fajardo nalang ang nagpabiling labing taas nga lokal player kung itandi sa ubang teams apan tataw nga dili siya lang maoy makapadaog sa team kung walay suporta gikan sa iyang mga teammates.

Adunay labing menos tulo ka Lancers nga mahimong maoy modepensa ni Fajardo ug kini mao sila si Adrian Lao, Rene Jun Saycon ug Andrew Avillanosa.

Ang Lancers may dako sab nga bentaha sa backcourt bisan pa og anaa sa UC si Quinton Brian Heruela nga kanhi UV junior player kinsa mitapon sa Webmasters sa miaging summer ug ang nakalig-on mao ang beteranong mga point guards nga sila si Harold Cincoflores ug Eman Calo ug dugang pa kanila ang rookie nga si John Michael Abad.

Bisan sa shooting guards nakabentaha sab gihapon ang Lancers tungod kanilang Phil Mercader, Ralf Olivares ug Harlow Chad Villanil ilabi na kay wala na moduwa alang sa UC ang tirador nga si Moncrief Rogado.

Ang Lancers makasalig sab sa ilang rookies nga sila si RG Rios ug Chris Yonnel Perolino nga gikan sa high school.

Sa laing bahin, ang Webmasters nga nangangkon sab nga mas lig-on karon ang ilang team kung itandi sa miaging tuig ug mas preparado sila karong tuiga, mipalig-on sa ilang poste tungod sa pagbalik ni Edward Pao ug mosandig sab sa ilang shooters nga sila si Robinson Mohammad ug rookie Gerald Ampoon. Dili sab pabentaha ang ilang backcourt tungod kang Heruela ug sa maisog ug miumento pag-ayo nga si Luigi Francis Bercede, anak ni bise-mayor Glen Bercede sa Mandaue City kinsa nagduwa sa USC Warriors sa miaging tuig.

Ang Webmasters aduna sa’y duha ka rookies nga makatabang og gamay sa opensa nga mao sila si Archie Bryan Batua ug Erden Glen Magallanes.

Ang Lancers ug ang Webmasters parehong walay mantsa sulod sa upat ka duwa ug naghupot og 4-0 nga baraha ug pareho silang nakahibalo kung unsa ka importante ang modaug karong gabhiona.

Mga duwa karon:

(Cebu Coliseum)

1 pm DBTC vs. USJR (Jrs.)

2:30 pm UC vs. USC (Jrs.)

4 pm USJR vs. DBTC (Srs.)

5:30 pm UV vs. UC (Srs.) (BANAT)