CEC Dragons nagmangtas

CEBU, Philippines - Gipakita sa Cebu Eastern College (CEC) Dragons nga mangtas pa sila sa University of Southern Philippines Foundation (USPF) Baby Panthers pinaagi sa pag-iskor og 87-73 nga kadaugan aron magsawo sa ikaduhang dapit sa secondary division sa 10th Cebu Schools Athletic Foundation Inc. (CESAFI) basketball event kagabii diha sa Cebu Coliseum.

Ang Dragons, kinsa gipanitan sa University of the Visayas (UV) Baby Lancers sa miagi nilang duwa walay puangod nga mimakmak sa Baby Panthers.

Ang Dragons nga milabaw og 30 puntos, 70-40 paghuman sa third period, mipilde sa Baby Panthers sa halos tanang departamento gawas lang sa free throws diin si James Neil Sumayang nakapasud la'g duha sa 13 ka attempts.

Gahi sab ang depensa sa Dragons diin naglisod ang Baby Panthers paglabang sa midcourt nga maoy nasinati sa nahauna sa miaging tuig dihang gimasaker sila sa tanan nilang kaatbang.

Si Benjamin James Zosa milawog og 24 puntos alang sa Dragons, samtang si Sumayang mihungit og 12 puntos alang sa kadaugan.

Ang torotoy'ng magduduwa sa Dragons nga si John Li Anthony Damole, kinsa mikompleto sa talagsaong four-point play sa wala pa ang halftime, mibugwak og singko puntos.

Si Rommel Diapera, ang labing dugay nga player sa Baby Panthers mibagdok og 32 puntos, samtang si Mar Riger Cavan miburak og 19 puntos. Si Joshua Corcilles, usa sa leading scorers sa Baby Panthers gilimitahan lang ngadto sa 11 puntos.

Puntos Matag Usa

CEC (87) - Zosa 24, Sumayang 12, Vilarias 11, Montalvo 10, Regidor 9, Bauya 6, Damole 5, Olayon 4, Villarosa 2, Roxas 2, Sypongco 2

USPF (73) - Diapera 32, Cavan 19, Corcilles 11, Roble 6, Neri 3, Metante 2. – BANAT NEWS