UV Green Lancers, 3-0 na

CEBU, Philippines - Gilatigo sa nine-time champion University of the Visayas (UV) Green Lancers ang undermanned nga University of San Carlos (USC) Warriors, 63-52 aron maangkon ang solong liderato uban ang 3-0 nga baraha sa collegiate division sa 10th Cebu Schools Athletic Foundation Inc. (CESAFI) niadtong Martes sa gabii diha sa Cebu Coliseum.

Ang UV Lancers may usa ka duwa na nga labaw sa ilang karibal University of Cebu (UC) Webmasters (2-0), nga naglaraw sab nga mosakmit sa ilang ikatulong daog karong gabii batok sa walay daug-daog nga University of San Jose-Recoletos (USJ-R) Jaguars.

Ang mangtas nga Lancers nagpakita og mas maayong teamwork ug wala sila magpatandog bisan sa hugot nga depensa sa Warriors, kinsa mi-rally sa nanghinapos nga bahin sa fourth period diin sila misikit og sayes puntos, 52-58 sa katapusang 1:13 sa duwa.

Apan ang Lancers mitusak sa ilang katapusang singko puntos alang sa ilang 11 puntos nga kadaugan.

Ang mga guwardiya nga si Ralf Olivares ug Harold Cincoflores maoy nangu sa Lancers sa ilang 12 ug 11 puntos matag usa. Sila lang duha ang naka-iskor og double figures alang sa Lancers.

Nakatabang usab og daku si Rene Jun Saycon, apan ang laing big man nga si Andrew Avillanosa dili kaayo epektibo    tungod kay igo lang siyang mi-iskor og dos puntos.

Ang Warriors mihangop sa

pagbalik ni Michael Cantonao gikan sa usa ka semanang pahuway tungod sa iyang chicken pox, apan ang tandem nilang Joven Cid Cortes ug Sam Hermosa maoy nangu sa USC nga nagkumboya og 32 puntos. 

Puntos Matag Usa

UV (63) - Olivares 12, Cincoflores 11, Mercader 9, Saycon 9, Calo 5, Abad 4, Lao 4, Avillanosa 2, Cabahug 2, Delantar 2

USC (52) - Corets 17, Hermosa 15, Santos 8, Cantonao 6, Codilla 3, Panerio 3. – BANAT NEWS