USC Warriors hapit madisgrasya sa USJ-R Jaguars sa 10th CESAFI

CEBU, Philippines – Nahanaw ang 22 puntos nga bentaha sa University of San Carlos (USC) Warriors, apan nakahimo gihapon sa pagdaog, 76-75 batok sa University of San Jose-Recoletos (USJ-R) Jaguars sa kontrobersiyal nga duwa sa 10th Cebu Schools Athletic Foundation Inc. (CESAFI) sa miaging adlaw diha sa Cebu Coliseum.

Samtang wala pa kini mahusay sa CESAFI board ubos ni commissioner Felix Tiukinhoy, mahimong masapawan ang maong kaguliyang atol sa duwa karong gabii tali sa 2-0 nga Southwestern University (SWU) Cobras ug sa University of Cebu (UC) Webmasters sa main game.

Gilubong og 22 puntos, 37-59 sa third period, ang Jaguars milusad og trapping defense sa tibuok fourth period ug misaler ang ilang gihimo diin ilang na-outscored ang Warriors, 34-15 aron lang mapilde og usa ka punto.

 Nahitabo ang kontrobersiya human makapasulod sa iyang tirada si Jaymar dela Peña alang sa usa ka buzzer-beating shot, apan ang wala pa matino kun two-pointer ba ang maong basket o usa ka three-pointer. Dihang nag-itsa pa lang si Dela Peña, ang usa sa tulo ka mga referees miisa sa iyang kamot ug misenyas nga tres, apan pagkahuman sa duwa, naglisod na og hukom ang mga officials kun pila gyud ang kuwentada sa maong basket.

Ang coach sa Jaguars nga si Edito Salac dali kaayong nakadagan taliwala sa korte aron pagsuta kun unsay desisyon sa referee. Ang mga dumadapig sa Warrrios nagkanayon nga usa lang kadto ka dos puntos, apan ang mga pro Jaguars nag-ingon sab nga usa kadto ka three-pointer.

Ang kampo sa Jaguars gikatakdang mosumitir karon sa ilang written protest aron pagtuman sa tagal nga 48 oras gikan sa hitabo. Ilang gipangayo nga adunay five-minute overtime. Gusto sab sa Jaguars nga rebiyuhon ang videotape, apan walay bisan usa nga miangkon niini. 

Ang Warriors naglabaw og tres puntos, 76-73 human sa split charities ni Nilton John Otida sa nahabiling 3.3 segundos, apan dihang ball possession na sa Jaguars, kalit mi-itsa si dela Pena atol sa paghuni sa buzzer nga maoy nakapahugyaw sa katawhan. Ang wala lang masayri kun dos o tres puntos ba.

Si Joven Cid Cortes, kinsa maoy nidominar sa undergoal maoy topscorer sa Warriors uban ang 21 puntos, samtang upat sa iyang teammates miposte sab og double figures.

 Si Gian Carlo Albarillo maoy nangu sa Jaguars sa iyang 18 puntos samtang sila si Jason Nudalo ug Edwin Bibera nagkumboya og 27 puntos. 

 Sa sayo pa, ang nine-time champion University of the Visayas (UV) Green Lancers mikulit sa ilang ikaduhang sunod-sunod nga daog human ilang gipanitan ang Cebu Institute of Technology-University (CIT-U) Wildcats sa iskor nga 89-75 ug nag-uban sa Southwestern University (SWU) Cobras sa liderato sa managsama nilang 2-0 win-loss records. 

 Si Edrian Lao mirehistro og   22 puntos, samtang ang mga guwardiyang sila si Eman Calo ug Phil Mercader nagkumboya og 23 puntos alang sa Lancers.

Si Chester Curso adunay 20 puntos alang sa Wildcats, gisundan ni Arnel Ipang nga adunay 17 puntos ug Floyd Taboada sa iyang 13 puntos. (BANATSPORTS)