Patiray sa Mango Square

CEBU, Philippines - Laing duguon nga aksiyon ang masaksihan sa ipahigayong Extreme Muaythai Championship-“Art of War” karong gabii diha sa Mango Square, ning siyudad.

Si kanhi Muaythai National Team member ug 2007 Asian Muaythai Championship bronze medalist Eugene 'El Torrero' Toquero makigpinaksitay batok sa walay pildeng MMA fighter Johnjier 'The Dangerous' Torbiso sa 57 kgs. class nga maoy main event.

Sa supporting bout, si Joseph 'The Samurai' Eder moharong ni Gino 'The Projectile' Po sa 62 kgs.

Ang knockout artist nga si Pablo 'The Predator' Santillan makiglayog ni Loloy Esfra sa 61 kgs. division, samtang si Imbo Estanel makigsambunot batok ni Junrey Soquete.

Mopakita usab sa iyang kabangis ang igsuon ni Johnjier nga si John Edu Torbiso batok    ni Ypanto Senyo sa    48 kgs., samtang si Jiody Arcenal mopakita sa iyang kabangis batok ni Jonathan Nacua.

Si Sammy Embalsado, kinsa maoy unang mokatkat sa ring, tinguhang mokulit og daog batok ni Benjamin Capisnon sa lima ka hugna nga sangka.

Ang giilang "The Golden Leg" sa Thailand nga si Ajarn Poodparnoi Worawoot motunga sa maong fight card nga gipasiugdahan sa Arquillano Muaythai Promotions Inc. ug sa Naris Singwancha Promotions of Thailand.  – BANAT NEWS