LLBA Selection mipilde sa Thursday Club All-Star

CEBU, Philippines - Wala mobati'g kaikag ang Lapu-Lapu Basketball Association (LLBA)-Selection ngadto sa nagdapit kanila nga Thursday Club All-Star sa Jugan Consolacion pinaagi sa pagpilde sa iskor nga 97-91 sa ilang "exhibition game" niadtong Domingo sa gabii diha sa Brgy. Jugan sa lungsod sa Consolacion.

Pagsugod pa lang, sikit na kaayo ang aksiyon nga miresulta sa panagtabla paghuman sa unang 10 minutos sa duwa, 25-all.

Sa sunod kuwarter, ang Thursday Club mihinay-hinay og inat sa ilang labaw ug   miangkon sa bentaha sa halftime sa iskor nga 52-49.

Gumikan sa kagamay sa labaw, dali nga nailog sa LLBA Selection ang labaw luyo sa mga paningkamot nilang Jimboy Igot ug Oriel Manilag, 75-66 paingon sa final period.

Nailog sab hinuon og balik sa Thursday Club All-Star ang labaw sa tunga-tungang bahin sa fourth period, apan wala sila makalahutay sa kainit nga gipabuhagay sa LLBA Selection, kinsa milabaw og balik sa nanghinapos nga bahin sa final period.

Si Igot milansang og 20 puntos ug si Mamilag mirehistro'g 19 puntos alang sa LLBA Selection ni coach Billy Nadado, ang tag-iya sa D' House of Sports tailoring.

Lima ka players sa Thursday Club-All Star ang miposte og double figures nga gipangulohan nilang J. Taborada ug Sasing nga parehong adunay 14 puntos.

Nahimong posible ang exhibition game pinaagi sa pagsuporta sa mga opisyales sa barangay Jugan. (BANATSPORTS)