Yoo Naigo sa Bazooka
CEBU, Philippines - Atubangan sa kapin 30,000 ka mga Bol-anon, gipamatud-an ni AJ “Bazooka” Banal nga andam na siya sa laing word title fight, kini human niya gipaluhod sa round 5 ang Koreano nga si Big Yoo sa main event sa “Sandugo-Labanan ng Kampeon” fight card didto sa Carlos P. Garcia Sports Complex in Tagbilaran City.
Bisan paman og sayo niyang natapos ang away, giangkon sa bag-ong WBO Asia-Pacific bantamweight champion nga ang away batok ni Yoo mao na ang usa sa mga lisud nga away sa iyang karera.
Gipakita sa kanhi Korean champion ang iyang ka maayong laki sa body punch nga maoy iyang gigamit batok sa ALA boy nga si Banal kinsa nakahiagum usab og dakung gisi sa iyang tampihak human sa accidental headbutt sa round 2.
Apan atubangan sa ka-agresibo ni Yoo, usa ka right cross, gisundan sa makabungog nga left uppercut ang gibuhian ni AJ “Bazooka” Banal aron mapatumba ang Koreano sa nahibiling 1:59 sa fifth round.
Si Yoo kinsa wala pa matumba sa tibuok niyang karera sa boksing misarasay sa wa pa kini miluhod atubangan sa iyang korner diin giiphan siya ni referee Bruce MacTavish, apan tungod sa kabangug wala na makahimo pa pagbarug.
Sa ilang bahin, nagkahiusa ang opinyon sa amahan sa ALA Gym nga si Antonio Aldeguer ug WBO Vice-president Leon Panoncilio kinsa pulos miangkon nga dili sayun nga away ang giagian ni Banal batok ni Yoo.
“He realy studied the fight of Banal and Concepcion ” matud pa ni Aldeguer, “A very difficult fight for Banal” dugang pa ni Panoncilio.
Samtang sa supporting bouts, gi-TKO sa round 2 ni lightweight prospect Jason Pagara ang Koreano nga si Young Bin Kim, samtang laing ALA Stable mainstay nga si James Bacon mipatikuko usab ni Eric Macas sa Lanao del Norte sa sixth round. (BANAT NEWS)
- Latest
- Trending
