Heavy Bombers, Blazers bumangon sa kabiguan
MANILA, Philippines - Matapos ang kanilang opening day loss, natikman na rin ni dating PBA superstar Vergel Meneses ang una niyang panalo bilang isang head coach sa 86th NCAA men’s basketball tournament.
Humakot si Cameroonian Joe Etame ng 15 points, 15 rebounds at 2 shotblocks para pangunahan ang 67-62 overtime win ng Jose Rizal University sa Letran College kahapon sa The Arena sa San Juan.
“Siyempre, very happy ako na nanalo ako dito sa NCAA as head coach,” sabi ng 41-anyos na si Meneses, ang 1995 PBA Most Valuable Player (MVP), sa kanyang alma matter. “Hopefully, ma-sustain namin itong ganitong klaseng intensity.”
Sinamantala ng Heavy Bombers ang mintis na jumper ni Kevin Alas at turnover ng Knights sa huling tatlong minuto ng extension period para kunin ang 63-59 abante galing sa apat na freethrows nina Etame at Alex Almario sa huling 2:31 nito.
Ang 24-second violation ng Letran ang nagresulta sa split ni Almario para sa 64-59 lamang ng Jose Rizal kasunod ang undergoal stab ni Anthony Lopez na nagbaon sa Letran sa 66-59 sa huling 1:05 ng laro.
Sa unang laro, binigo naman ng College St. Benilde ang Arellano University, 70-64, para sa kanilang unang tagumpay at makatabla ang Mapua Institute of Technology.
Nagsalpak si Mark de Guzman ng apat sa siyam na three-point shots ng Blazers upang tumapos na may 14 , game-high 9 assists at 5 rebounds, habang may 13 marka naman si Carlo Lastimosa, ang pamangkin ni dating PBA star Jojo Lastimosa.
“Our speed and three-point shooting help us in this ,” ani St. Benilde coach Richard del Rosario.
- Latest
- Trending
