Orcollo, Alcano kumakasa pa sa Doha World Pool
MANILA, Philippines - Tuluyan nang umabante sa Round of 64 sina Dennis “Robocop” Orcollo at Renato “The Volcano” Alcano matapos manaig sa kani-kanilang kalaban sa 2010 World Pool Championships sa Qatar Billiards and Snooker Federation hall sa Doha, Qatar.
Tinalo ni Orcollo, ang 2010 World Pool Masters champion, si Chis Milling ng Great Britain, 9-4, samantala binigo naman ng 8-ball at 9-ball world titlist na si Alcano si David “El Matador” ng Spain, 9-5.
Ang naturang mga panalo ang nag-akay kina Orcollo at Alcano sa grupo nina Francisco “Django” Bustamante, Antonio “Nickoy” Lining, Venancio “Tukao” Tanio, Oliver Medenilla, Francisco Felisilda, Raymund Faraon, Israel “Amay” Rota at Allan “Surigao” Cuartero sa Round of 64 ng naturang $250,000 tournament.
Ang magkakampeon ay tatanggap ng $36,000.
Giniba naman ni Bustamante si Tohru Kuribayashi ng Japan, 9-6; tinalo ni Lining si Khalid Al Kamale ng United Arab Emirates, 9-5; pinayukod ni Tanio si Liu Haitao ng China, 9-8; tinalo ni Medenilla si Fahad Al Barak ng Kingdom of Saudi Arabia, 9-6; at hiniya ni Felisilda si 2006 Doha Asian Games 9-ball gold medallist Antonio “Ga-Ga” Gabica, 9-8.
Sinibak ni Faraon si Nick Van den Berg ng Netherlands, 9-8; ginitla ni Rota si Nguyen Phuc Long ng Vietnam, 9-6; at kinaldag ni Cuartero si Neils Feijen ng Netherlands, 9-6.
Natalo naman si 2010 US Open 10-ball ruler Lee Vann “The Slayer” Corteza kay Christian Reimering ng Germany, 5-9, na naghulog sa kanya sa loser’s bracket.
Buhat sa losers bracket, nakaakyat sa Round of 64 sina Marlon “Marvelous” Manalo at Joven Alba matapos talunin sina Francis Crevier ng Canada, 9-2, at Kenny Kwok ng Singapore, 9-5, ayon sa pagkakasunod.
Kailangang manalo sa kani-kanilang laban sina Gabica, Corteza, Jeffrey “The Bull “ de Luna at 2010 Player of the Decade Efren “Bata” Reyes para makaahon sa losers bracket.
Ang iba pang pumasok sa Round of 64 ay sina Sandot Tot ng Malta at Stephan Cohen ng France.
- Latest
- Trending