Canillas mo-away diha sa Toledo

CEBU, Philippines - Mo-away atubangan sa iyang mga katagilungsod ang ALA knock-out artist nga si Larry “Bon Jovi” Canillas karong Hulyo 13 didto sa Lutopan Recreation Center sa lungsod sa Toledo.

Si Canillas kinsa adunay 13 ka daog, 11 niini gikan sa knock-out katapusang mipakita sa iyang kakusug niadtong miaging buwan batok ni Dexter Mendoza kinsa iyang gipalukapa sa second round didto sa Mandaue.

Musukod sa kalibre ni Canillas ang taga-Metro Manila nga si Prell “The Joker” (6-5-4) Tupas kinsa misaad nga mopilde ni Canillas sa kaugalingon niyang balwarte.

Uban ni Canillas mao ang laing ALA boxer nga si Jojo “The Flash Intor” kinsa makigsinukmagay sa Bol-anong si Romago Gelig sa ilang six round superbantamweight bout.

Gipasiugdahan sa ALA Promotions, PAMCC ug Pastoral Council sa Lutopan, ang maong boxing card naglakip usab sa sangka nila ni flyweights prospect Marjun Macahilig batok Mark Anthony Geraldo, Bantamweights nga sila si Mark Jesson Taroja ug Jaime Alin ug sangka nila ni superflyweights Kotsky Ebalang batok Charlie Sabijon.  – BANAT NEWS