Free throw ni Palad mipadaog sa Yellow

CEBU, Philippines - Krusyal nga free throw ni Amay Palad sa nahabiling dos segundos maoy nakapadaog sa Yellow team sa kulbahinam nilang duwa batok sa Violet, 76-75 sa nagpadayon nga Phase 3 Camella Homes Sunday Basketball Club (SBC) cagefest niadtong Domingo didto sa Villas Magallanes gym sa Sta. Lucia Property sa Lapu-Lapu City.

Naglabaw ang Violet og 10 puntos paghuman sa unang 10 minutos sa duwa, 22-12, apan ang maong labaw gitabanga'g kitkit nilang Alan Sepe, Jun Geraldez ug Palad nga maoy nangulo paglusad og 24-11 run aron ilogon ang momentum sa halftime, 36-33.

Misugod ang kainit sa duwa pag-abli sa second half diin nagsinukliay sa ilang opensiba ang duha ka kampo inubanan ang walay tihik-tihik nga depensa. Hinuon anaa gihapon sa   Yellow team ang momentum.

Mahatod unta ang duwa ngadto sa overtime human makatabla ang Violet, 75-all sa nahabiling dos segundos, apan si Palad gi-foul ni Rolly dela Pieza nga maoy nakaanghel sa Yellow. Ang free throw ni Palad maoy nakabuak sa panagtabla ug mikandado sa kadaugan.

Puntos Matag Usa

YELLOW (76) - Sepe 31, Palad 12, Geraldez 12, Sumilang 6, Rabi 4, Maratas 2, Villapez 2

VIOLET (75) - Braniola 18, Dela Pieza 16, Cortes 10, Alamacen 10, Ragaza 8, Vega 5, Aparente 4, Pleños 4, Tongol 2. – BANAT NEWS