Smart-Gilas Pilipinas gitiwasan sa Syria

CEBU, Philippines - Human sila gitagak sa Lebanon sa quarterfinals, nakahiagum og laing kaparotan ang Smart-Gilas Team Pilipinas human sila gitiwasan sa Al Jalaa Syria, 83-81, FIBA Asia Championship Cup didto sa Al Gharaffa Stadium sa Doha, Qatar.

Kini mao ang ikalimang pilde sud sa unom ka duwa alang sa Smart Gilas nga nasugamak karon sa ikaunom nga dapit sa standing.

Sakit ang maong kapildehan alang sa mga Pinoy, tungod kay naglabaw pa sila og 11 puntos, 42-31 sa halftime, apan ang imports sa Syria nga sila si Garnet Thomson ug Michael Madanly nagkumboya og 40 puntos aron papason ang dakung labaw sa Smart Gilas.

 Si Chris Tiu maoy nangulo sa Smart-Gilas sa iyang 17 puntos, gisundan ni Mac Baracael nga miiskor og 15 puntos ug Japeth Aguilar nga midugang og 13 puntos. - BANAT NEWS