Kinamangay na sa Waterfront

CEBU, Philippines - Miabot na ang adlaw alang ni Michael Domingo kansang tuyo

ug tumong mao ang pagpanimalos ngadto ni Colombian Luis Melendez nga maoy nakahunong sa boxing career ni Z 'The Dream' Gorres.

Ang kanhi WBO Oriental bantamweight champion nga si Domingo ug Melendez maoy magbinirahay sa main event sa "Hangad na Paghihiganti" boxing promotions sugod sa alas-6 karong gabii diha sa Waterfront Cebu City Hotel and Casino sa Brgy. Lahug, ning siyudad.

Sa weigh-in kagahapon didto sa Ayala Activity Center, makita sa dagway ni Domingo ang kahinam nga makigbinukbukay batok sa world bantamweight contender nga si Melendez.

Ang ALA prospect nga si Domingo yanong mikuha sa weight limit nga 118 lbs., samtang si Melendez milapas og usa ka libra, apan gihatagan lang kini'g konsiderasyon kay usa lamang kini ka "non-title" fight.

Sa final press conference niadtong Biyernes sa gabii didto sa Waterfront Hotel, si Domingo wala mosaad kun ikapila nga round niya tumbahon si Melendez, apan iyang gipasalig nga dili niya pakyason ang mga Sugbuanon, nga sama kaniya naghandom sab og daog.

Sa iyang bahin, bisan pa sa taas niyang biyahe, mipasalig si Melendez nga anaa siya sa hustong kondisyon ug subli niyang ipakita ang iyang kabangis ibabaw sa ring batok ni Domingo.

Nasayod hinuon si Melendez nga dili sayon nga kontra si Domingo ug iya kining gipangandaman og maayo. Mipailawom siya og todo-ensayo ug mihimo kini'g 200 ka sparring sessions batok sa mas bug-at ug dagkung mga boksidor.

Mahinungdanon kaayo alang kanila ang maong away, kay gawas nga mosaka ang ilang ranking sa bantamweight division, may purohan kini alang sa world title.

Sa supporting bout, ang Sugbuanong si Jimrex Jaca subli na sab nga mopakita sa iyang katakus batok ni Kenyan James Kimori. Ang duha pulos misaad og knockout. Si Kimori mipasumbingay nga adunay boksidor nga motumba sa ikalimang round. Mao sab si Jaca, kinsa miingon nga adunay motumba sa maong round, apan dili siya kun dili si Kimori.

Mobanat sab sa laing eight-rounder undercard bouts ang duha ka mga ALA rising stars nga sila si Jason Pagara ug superfeatherweight James Bacon kinsa makigsinukliay'g kumo batok nilang Romeo Jakosalem sa Davao ug Cerilo Espino sa Batangas.

Mokompleto sa fight card mao ang tulo ka four-rounder matches tali nila Kotsky Ebalang batok Rocky Sismundo, Welberth Loberanis batok Anthony Galigao ug Jocel Gestopa batok ni Gerald Ranque.   (BANATNEWS)