Takayama sakop na sa ALA Boxing
CEBU, Philippines - Usa na ka ALA Boy si kanhi WBA ug WBC minimumweight champion Katsunari Takayama sa Osaka Japan human nipirma'g kasabotan uban sa nabantog nga ALA Promotions.
Si Takayama nga dul-an na sa usa ka buwang nag-train sa ALA gym, mopakita sa labing una niyang aksiyon isip sakop sa ALA Boxing sa “Best of Boxing 1” karong Sabado diha sa Mandaue City Sports and Cultural Complex.
Harungon sa 26-anyos nga si Takayama si South African Nkosinathi Joyi alang sa IBF crown nga maoy main event sa maong boxing card nga gipasiugdahan sa ALA Promotions.
Si Takayama nakigharong ni Jayson Rotoni sa usa ka tune-up fight alang sa iyang pagpangandam sa maong away.
Bitbit ang 23 ka daog, siyam niini gikan sa knockout uban ang upat ka pilde, si Takayama nahimutang sa ika-11 sa world ranking sa IBF.
Si Takayama mipilde sab sa Filipino contenders sama nilang Rollen del Castillo sa ALA Gym, Elmer Gejon, Fabio Marfa ug Mating Kilakil
Sa supporting event, ang Sugbuanong si Larry Canillas, kinsa lab-as pa sa iyang 6th round TKO nga kadaugan batok sa Tanzanian nga si Fred Sayuni didto sa Dubai mopakita na usab sa iyang katakus batok ni Dexter Mendoza, samtang ang beteranong si Jun Intor sa ALA makigsangka usab batok ni Jason Tarroja. (BANATNEWS)
- Latest
- Trending
