2,000 runners modagan sa Rundaue 2010

CEBU, Philippines - Kapin sa 2,000 runners ang gilaumang modagan sa Rundaue 2010 sayo ning buntag diha sa Parkmall sa Mandaue reclamation area.

Sukwahi sa miaging lumba sa Mandaue, ang mga organizers sa pagpangulo ni Kristian Cortez sa MJK Promotions misaad nga mopakatap og daghang marshals ug first aid ug ingon man water station sa matag 1.5 kilometros alang sa mga partisipante.

Ang lumba naglatid og 10K, 5K ug 3K categories.

Ning higayona, ang runners mosubay sa bag-o lang giablihang Cansaga bridge nga nagdugtong sa dakbayan sa Mandaue ug sa Liloan.

Mangu sa lumba karon mao si Kenyan missionary Simon Losiaboi, kinsa laraw mougkat og titulo sa Mandaue. Modagan sab ang mga banggiitang runners dinhi sa Sugbu sama nilang Mary Grace delos Santos, Madelyn Carter, Mary Joy Tabal, Mendel Lopez, Joebert Carolino ug Riez Enriquez.

 Ganting salapi ug gift certificates ang giandam alang sa mga top performer sa matag dibisyon.

Gipasiugdahan sa Mandaue City Sports Commission ug Department of Tourism, ang proceeds ning usa ka adlaw nga lumba mapunta ngadto sa CARE-7 Inc. alang sa ilang outreach programs ngadto sa Mandaue. (BANATNEWS)