Rundaue himuon open-for-all
CEBU, Philippines - May kausaban nga gihimo ang organizers sa Rundaue 2010 version 1 pipila ka adlaw sa dili pa ang lumba.
Ang lumba nga adunay tulo ka kategoriya himuon na nga "Open-for-All."
Kini nagpasabot nga ang unang moabot sa finish line lalaki man o babaye maoy mananaog.
Lahi sa naandang lumba diin ang matag kategoriya gibahin sa men ug women’s open.
Si race organizer Kristian Cortez sa MJK Promotions mihukom nga himuon na lang kini nga “open-for-all” tungod sa kadaku sa premyo.
Sa pagka karon, miabot na'g 900 ka runners ang nagpalista ug gilauman nga moabot pa kini ngadto sa 1,500 sa adlaw sa lumba.
Mga dekalibreng runners nga magtigi sa 10K run naglakip nila Simon Losiaboi, Mendel Lopez, Mary Grace delos Santos, Madelyn Carter ug triathlete Noy Jopson.
Ang makampiyon sa 10K mobulsa og P5,000, ang manghawod sa 5K makadawat og P4,000 ug ang maghari sa 3K makaangkon og P3,000. (BANATNEWS)
- Latest
- Trending
