Z Gorres: Domingo modaog batok Melendez

CEBU, Philippines - Kompiyansa si kanhi bantamweight contender Z Gorres nga molampos ang iyang suod nga higala ug stablemate nga si Michael Domingo batok ni Colombian knockout artist  Luis Melendez sa ilang sangka karong Mayo 23 diha sa Pacific Grand Ballroom sa Waterfront-Cebu City Hotel.

Si Gorres mitambag ni kanhi WBO Oriental bantamweight champion nga si Domingo nga dili mokompiyansa ug magmabinantayon kay nabantog na si Melendez nga usa ka delikadong boksidor.

“Nindot ning duwaa, modaog gyud si Michael, pero lig-on pud si Melendez, dili lang gyud siya mokompiyansa,” matud ni Gorres.

Sa ilang pagbisita dinhi sa The Freeman kagahapon, sila si Gorres ug Domingo pulos mipadayag sa ilang kaandam sa pagpanulong dinhi sa Sugbu ni Melendez, kinsa maoy responsable sa pagpabugto sa karera sa boksing ni Gorres atol sa ilang sangka niadtong Nobiyembre 13 didto sa House of Blues sa Mandalay Bay Hotel and Casino sa Las Vegas.

Si Gorres nga padayon karong mipaubos sa rehabilitation therapy diha sa Perpetual Succour Hospital, nagkanayon nga daghan siya og nakat-onan sa pagkadisgrasya niya batok ni Melendez ug kining tanan iyang gipaambit ngadto sa iyang higala alang sa kalampusan niini karong Mayo 23.

Sa iyang bahin, si Domingo mi-asoy nga nindot ang dagan sa iyang training diha sa ALA Gym ug didto sa Japan. Matud niya nga anaa na siya sa hustong kondisyon alang sa maong away.

Ang lumad nga taga-Sultan Kudarat nga si Domingo nagkanayon nga paningkamotan niya nga modaog ug iya kining ipahinungod ngadto ni Gorres ug ingon man aron usab matuman ang iyang damgo nga mahatagan og usa ka world title fight gawas sa nasud. – BANAT NEWS