OCS milansa'g daog sa 1st Boylen Cup 2010

CEBU, Philippines - Nagmangtas ang Overseas Courier Services (OCS) sa final quarter aron paglansang og 58-49 nga kadaugan batok sa Boylen Marketing sa pagsugod sa 1st Boylen Cup 2010 basketball tournament niadtong Mayo 1 didto sa Metropolis gym sa Sta. Lucia Property sa dakbayan sa Lapu-Lapu.

Walay puas nga nakaduwa ang OCS diin ilang gidominar ang duwa gikan sa pagsugod hangtod na sa pagkahuman luyo sa madasigong kakugi nilang Louie Ariesgado ug Bernard Arac nga nagkumboya og 31 puntos.

Ang Boylen Marketing ni team owner Arnold Pestaño miaksiyo'g gukod sa third period ug ilang napahakan ang labaw ngadto sa singko puntos, 41-46 paghuman sa maong kuwarter. Ang ilang kainit tukwahaw lang naungot dihang gipugngan kini sa OCS, kinsa milansang og 15-6 run sa tibuok fourth quarter aron pagposte og nuybe puntos nga kadaugan.

Sila si Ariesgado ug Arac maoy pabilo alang sa unang daog sa OCS. Si Ariesgado miduslit og 20 puntos, samtang si Arac midagkot og 11 puntos. Ang team manager sa OCS nga si Arnold Pascual ug playing coach Billy Nadado parehong mikadlit og siyete puntos sa maong kadaugan.

Si team owner Arnold Pestaño mao sab ang topscorer sa naparot nga Boylen Marketing pinaagi sa iyang 19 puntos, gisundan ni Dodoy Dawal nga adunay 12 puntos.

Sa laing aksiyon, ang S. Lozano Ent. milansang sab sa una nilang daog batok sa Jhoaris Bakeshop sa iskor nga 45-42.

Si Gary Fernandez miposa'g 19 puntos ug si Lyndon Artiaga mitimang og 11 puntos aron pangulohan ang S. Lozano Ent.

Ang pilderong Jhoaris Bakeshop gipangulohan ni Verallo, kinsa mibagdok og 16 puntos, si Louie dela Cruz mitimang og 13 puntos, samtang si team owner Sunny Pestaño miabuno og singko puntos.

Puntos Matag Usa

Unang duwa:

OCS (58) - L. Ariesgado 20, Arac 11, Pascual 7, Nadado 7, Tudtud 6, Ombay 5, Horca 3, A. Ariesgado 2

BOYLEN MKTG. (49) - Pestaño 19, Dawal 12, Gepiga 6, Quiñones 6, Miñoza 2, Villarosa 2

Ikaduhang duwa:

S. LOZANO ENT. (45) - Fernandez 19, Artiaga 11, Alo 5, Andrino 4, Pestaño 4, Quiñones 2

JHOARIS BAKESHOP (42) - Verallo 16, Dela Cruz 13, Jocas 6, Pestaño 5, Jesryl 2. – BANAT NEWS