Talisay summer dance clinic tapuson karong Biyernes

CEBU, Philippines - Kapin sa usa ka gatos ka mga batan-ong dancers sa Talisay City ang mogradwar sa pagtapos sa Talisay Summer Dance Clinic karong Biyernes sa gabii diha sa  Talisay City Hall.

Gipasiugdahan sa Talisay City Sports Commission (TCSC), ang usa ka buwan nga dance clinic nga gisugdan niadtong miaging buwan gisalmotan sa mga kabatan-onan gikan sa siyudad sa Talisay nga nagpangedaron og sayes anyos ug pataas.

Si TCSC executive director Engr. Jeanneth Villagonzalo nagkanayon nga sa 141 dancers, 31 niini sa modern standard, 30 sa dancesports ug 80 dancers sa Hawaiian.

Ang maong mga dancers mopasundayag sa ilang nakat-onan atol sa culminating program. Libre kini sa tanang Talisaynon nga buot mosaksi.

Mga bisita sa closing program mao mismo ang amahan sa dakbayan sa Talisay nga si Mayor Soc Fernandez, City Councilor Rodi Cabigas ug uban pang mga opisyal sa maong dakbayan.

Gawas sa dancesport clinic, may gipahigayon sab nga sports clinic sa basketball, volleyball, chess, table tennis, swimming, lawn tennis ug karatedo nga natapos niadtong miaging semana. – BANAT NEWS