Porter balhin sa UAAP

CEBU, Philippines - Usa ka promising Cebuano cager nga si Kristoffer James Porter sa Sacred Heart School-Jesuits (SHS-J) Eaglets ang mobiya sa Cebu Schools Athletic Foundation, Inc. (CESAFI) ug adto na moduwa sa UAAP karong Hulyo.

Kini tungod kay mobalhin na siya ngadto sa Ateneo Blue Eaglets, ang sister team sa Sacred Heart.

Gikompirmar ni Porter ang iyang interes nga mobiya sa Sacred Heart atol sa senemanang SCOOP forum nga gidumala ni Bobby 'Knights' Inoferio niadtong Huwebes didto sa Baseline Restaurant.

Ang 6-foot-5 nga Porter usa sa duha ka Eaglets nga gikuha isip re-enforcements sa Baby Lancers sa ilang pagsalmot ug pagdaog sa korona sa bag-o lang natapos nga regional finals sa National Basketball Training Center (NBTC) didto sa Dumaguete City.

Matud ni Porter, dili suliran ang iyang pagbalhin ngadto sa Ateneo kay sister-school man kini sa Sacred Heart ug gani ang Sacred Heart man maoy nagsilbeng satellite farm team.

Si Porter anaa na sa ika-upat nga tuig sa high school ug mo-gradwar sunod tuig, apan andam siyang mosakripisyo pagbalik sa third year aron lang mahimong sakop sa Blue Eagles. – BANAT NEWS