Pavlik gihubua'g bakus ni Martinez

CEBU, Philippines - Gipakuratan sa Argentinian nga si Sergio Martinez ang tibuok kalibutan human siya mihimo og usa ka upset batok sa two-time middleweight champion Kelly Pavlik sa ilang kumbati kagahapon didto sa Atlantic City Boardwalk Hall, New Jersey.

Ang underdog nga si Martinez mipilde ni Pavlik pinaagi sa unanimous decision aron mailog ang ang WBO ug WBC middleweight title gikan sa mga kamot sa amerikanong boksidor.

Ginamit ang iyang pabor sa gipaspason, sunod-sunod nga jab ug straight ang gibuhian sa walhong Argentinian aron lupigon sa puntos si Pavlik kinsa naputos sa dugo ang nawng gikan sa dakung gisi sa tuong kilay niini.

Napatumba ni Pavlik si Martinez sa ikapitong round, apan nakahimo pagbarug si Martinez aron ipadayon ang away hangtud sa katapusang bagting sa kampanilya.

Tulo ka mga hurado ang miiskor og 116-111, 115-111 ug 115-112 tanan pabor ngadto ni Martinez.

Ang bag-ong world champion nga si Martinez misaka sa record nga 45-2, 24KOs, samtang si Pavlik nakahiagum sa ikaduha niyang pilde sulod sa 38 ka away. - Lemuel P. Maglinte gikan sa AP (BANAT NEWS)