CVIRAA nakabawi, mikabkab og bulawan sa Palaro

CEBU, Philippines - Nakabawi ang Central Visayas Regional Athletic Association (CVIRAA) human sa law-ay nilang duwa sa miaging adlaw dihang si Loren Dale Echavez mibuak sa 12 na ka tuig nga record sa swimming, si Gia Bucag misiak sa duha na ka tuig nga rekord sa javelin throw ug si Daniel Noval sa 18 ka tuig nga rekord sa 100m run diin siya nagpabilin isip labing kusog nga atleta sa 2010 Palarong Pambansa kagahapon didto sa Tarlac Recreation Park sa San Jose, Tarlac.

Gawas sa tulo ka bulawan sa swimming ug athletics, ang CVIRAA mihakot sab og bulawan sa archery ug tennis aron pun-an ang ilang nahipos nga medalya sa overall ngadto sa unom ka golds, upat ka silvers ug duha ka bronzes human sa tulo ka adlaw'ng aksiyon ning usa ka semana nga sports conclave ubos sa superbisyon sa Departamento sa Edukasyon.

Si Echavez, 16-anyos misakmit sa bulawan human gitapos ang girls 100m freestyle sa oras nga 1:00.28. Iyang napapas ang miaging rekord nga 1:00.55 nga nakuha ni Althea Lim sa National Capital Region (NCR) niadtong 1998.

Maisip kini nga tam-is nga panimalos ni Echavez, kinsa igo lang mihakot og silver sa 400m freestyle.

Sa sayo pa, si Bucag mihimo og bag-ong rekord sa Palaro sa javelin throw nga 40.663 meters. Iyang gibuak ang rekord nga 39.63m nga gikulit ni Elena Camiring sa Western Visayas niadtong 1998.

Sa iyang bahin, si Noval nagpabilin sa iyang trono isip labing kusog sa Palaro dihang gidominar ang centuary dash sa oras nga 10.9 segundos. Iyang natupngan ang 1992 record nga gikagis ni Ronald Caluanan sa Cagayan Valley.

Didto sa San Sebastian subdivision tennis courts, ang CVIRAA nga gipangulohan ni Niño Siso mikabkab sab og bulawan pinaagi sa pagpilde sa Calabarzon, 2-1 sa secondary division. – BANAT NEWS