Toledo mohimo'g taekwondo summer clinic

CEBU, Philippines - Magkabudlay na sab si taekwondo master Kenneth Toledo karong summer gumikan kay ang Kenn Taekwondo Training Center mopahigayon sa ilang tinuig nga summer clinic nga pagahimuon sa lain-laing mga binyu sugod karong Abril 12 hangtod sa Mayo 21.

Mga batan-on ug ingon man ang advanced jins mahimong magpa-enrol sa ilang labing duol o mas pabor kanila diin ang KTCC mobutang og training camp nga naglakip sa Southhills International School, Bright Academy, Rivergate Mall sa Mango Avenue ug sa St. Benedict Learning Center.

Sa Rivergate, ang training himuon katulo sa usa ka semana gikan sa alas-3:30 hangtod sa alas-5 sa hapon sa adlaw'ng Lunes, Miyerkules ug Biyernes o di ba sa adlaw'ng Martes, Huwebes ug Sabado.

Sa Southhills pagahimuon kini matag adlaw'ng Lunes, Miyerkules ug Biyernes sa alas-9-10 sa buntag, ang St. Benedict sa alas-10:45 hangtod sa alas-11:45 sa mao gihapon nga adlaw alang sa beginners ug Martes, Huwebes ug Sabado sa advanced.

Sa laing bahin, ang Bright Academy mo-host sa KTCC sa Lunes ug Biyernes gikan sa ala-1:15 hangtod sa alas-2 sa hapon alang sa mga bata nga nag-edad og 4 hangtod sa 6 anyos ug alas-2 hangtod sa alas-3 sa hapon alang niadtong nag-edad og 7-anyos ug pataas.

Si Toledo, ang 4th dan black belter ug three-time US Big East taekwondo champion, maoy mangunay og maneho sa training program.

Alang sa dugang mga kasayoran, tawag lang sa 0917-6225366 ug 316-3498 o email coach Toledo sa [email protected]. – BANAT NEWS