Hornets tagak sa playoffs

CEBU, Philippines - Gitagak sa Portland Trail Blazers ang New Orleans Hornets sa ilang tinguha nga mo-abante sa playoffs human mo-iskor og 112-101 nga kadaugan ang Blazers kagahpon sa nagpadayong duwa sa National Baskertball Association (NBA) didto sa New Orleans Arena.

Bag-o pa lang gani nagsugod ang duwa may dos minutos pa ang milabay sa first period, daan nang nakapanimaho og kadaugan si Brandon Roy dihang ang iyang walay klarong tirada misulod bisan nasabdan ang iyang siko. Tuod man si Roy miburak og 28 puntos aron pangulohan ang Blazers.

Si Roy mikulit og 12-14 shooting ug mipasulod og onse sa unang 12 niya ka tirada diin duha niini mga lay-ups. Gisundan siya ni LaMarcus Aldridge kinsa miposa og 24 puntos.

Ang 44-29 nga Blazers pabiling naghupot karon sa ikawalong luna sa playoffs sa Western Conference samtang ang Hornets nga aduna na la’y nahibiling walo ka duwa, hingpit nang natagak tungod kay bisan og ila pang haruson ang tanang duwa, igo lang sila mo-abot og 42 ug dili motabla sa Blazers.

Si Darrell Collison maoy nangu sa Hornets sa iyang 22 puntos.

Ang pabiling buhi sa playoffs sa West mao ang Memphis (38-34) ug ang Houston (36-35) ug ang Hornets nahimutang na sa ika-11 nga pwesto.

Sa habig sa East, tulo na lang ka teams ang pabiling buhi pa sa ilang kampanya ug kini mao ang Chicago Bulls (34-38), Indiana Pacers (27-46) ug ang New York Knicks (26-26).

Sa laing duwa, ang rookie guard sa Dallas Mavericks nga si Rodrigue “Roddy” Beaubois mihakot og 40 puntos gikan sa bench aron pangulohan ang Mavs ngadto sa 111-90 nga kadaugan batok sa host Golden State Warriors didto sa Oracle Arena sa Oakland, California.

Si Beaubois igo lang nakaduwa og 48 segundos dihang napilde sila sa Portland ug kagahapon mihimo siya’g siyam sa 11 ka attempts gikan sa three-point territory.

Gipatagamtam sa Utah Jazz ang ika-15 nga sagunson nga pilde sa Washington Wizards nga nahimong usa ka team record pinaagi sa ilang 103-87 nga kadaogan.

Gisungay sa Chicago Bulls ang New Jersey Nets, 106-83 ug midaog ang Los Angeles Lakers batok sa Houston Rockets, 109-101. - Gabby G. Malagar gikan sa NBA.com (BANAT NEWS)