Mactan Hotmen 3-0 na sa BOC Sportsfest

CEBU, Philippines - Ang powerhouse Mactan Hotmen dribblers ni team manager Collector Bingo Matugas migamit og makahubog nga 26-7 run sa third period ug padayong miprotehir sa ilang labaw sa fourth quarter aron paglikay sa upset nga gitumong ngadto kanila sa Totong Villanueva-re-enforced Cebu Customs United Personeros Association (CCUPA) aron mo-iskor og 81-71 nga kadaogan sa nagpadayong Bureau of Customs 1st Port of Cebu Sportsfest didto sa Benedicto College gym sa dakbayan sa Mandaue.

Ang Hotmen kinsa naghupot na karon og 3-0 nga baraha, mipahinungod sa ilang kadaogan kaniadtong Huwebes isip birthday gift ngadto kang Matugas kinsa nagsaulog sa iyang adlaw'ng natawhan atol gyud sa ilang duwa.

Usa na lang ka duwa ang kinahanglan sa Hotmen aron pag-sweep sa elimination ug mo-abante sa semifinals nga adunay hapsay nga baraha.

Dihang naglingkod na si Villanueva sa kinatibuk-ang third period tungod sa barangay format nga dili kapulihan ang players sulod sa usa ka quarter, didto nakahuygo og maayo ang Hotmen kinsa mipatuarak og 26-7 nga rally aron pagdominar sa duwa ug yanong gipapas ang ilang 36-42 nga biya sa halftime. Si Villanueva kinsa usa ka abtik nga point guard, nagduwa kanhi sa Cebu City Niños alang sa nabungkag nga Inter-City Cup basketball tournament.

Si Ronnie Clapano maoy naghatag ug labaw balik ngadto sa Hotmen human lang nahanaw og kalit ang ilang 22-10 nga abante sa first quarter tungod sa pagsulod ni Villanueva sa second period diin didto molabaw ang CCUPA pinaagi sa basket ni Jury Garcia, 35-33 may 1:55 ang nahibilin sa wala pa ang halftime break.

Apan nagbayad ra usab ang CCUPA dihang naglingkod na lang si Villanueva sa third period ug halos wala na sila’y ikasagang sa nagpungasi nga puntos gikan sa Hotmen kinsa mipauwan og 26 puntos kung itandi sa CCUPA nga igo lang nakamaneho og siete puntos alang sa 62-49 nga labaw pabor sa Hotmen.

Ang speed demon nga si Jessie Bugtai maoy nangu sa Hotmen sa iyang 16 puntos ug si Ronnie Ruiz kinsa mihimo’g duha ka three-pointers sa third period, midugang og 15 puntos.

Si Villanueva maoy nangu sa CCUPA sa iyang game-high 26 puntos ug si Manny Bugtai midugang og 16 puntos.

Ang kanhi CIT Wildkittens coach nga si Romy Cal maoy gikuhang coach alang sa Hotmen.

Puntos matag usa:

Mactan Hotmen (81)— Bugtai 16, Ruiz 15, Mata 10, Ramos 9, Clapano 9, Ararao 7, Maningo 6, Yu 3, Sillar 2

CCUPA (71)— Villanueva 26, Bugtai 16, Estrada 7, Garcia 5, Batoon 4, Garcia 4, Castillo 3, Casul 2. - Gabby G. Malagar (BANAT NEWS)