Batawang gibaharan ni Solis

CEBU, Philippines - Nanganti ang kanhi Mexican champion nga si Ulises Solis nga patumbahun pag-usab ang Sugbuanong si Bert Batawang sa subli nilang panag-abot karong Marso 27 alang sa IBF junior flyweight eliminator didto sa Acapulco, Mexico.

Si Solis (29-2, 20 KOs) ug ang beteranong si Batawang (45-14, 37KOs) mag-ilog sa kahigayunan nga moaway alang sa IBF junior flyweight title nga kasamtangang gikuptan karon ni Colombian Carlos Tamara kinsa mao ang nikampiyon human niini gipilde pinaagi sa 12 round TKO ang Fil-Am nga si Brian Viloria naidtong Enero 23 didto sa Cuneta Astrodome.

Ang Mehikanong si Solis nagkanayon nga pakamangon niya pag-usab si Batawang sama sa resulta sa una nilang panagsangka niadtong tuig 2007. Matud pa usab ni Solis nga dakung babag alang kaniya si Batawang alang sa iyang damgo nga mabawi pagbalik ang iyang IBF title nga nahanaw kaniya kini nailog ni Viloria niadtong Abril sa miaging tuig.

Apan sa iyang bahin, si SGG Promotions bigboss Sammy Gello-ani masaligon nga mulampos ning higayuna si Batawang kinsa padayon karon sa iyang walay puas nga pagbansay-bansay alang sa katumanan sa tinguha niyang panimalus batok ni Solis . - Lemuel P. Maglinte (BANAT NEWS)