Macasieb mopahigayon running clinic sa Sugbu

CEBU, Philippines - Ang multi-titled Fil-Am triathlete nga si Arland Macasieb mopahigayon og libreng running clinic karong Marso 5-6 diha sa Actdive Zone sa Ayala Center-Cebu.

Giulohan og "Optimal Running Technique," si Macasieb motuki sa mga lain-laing hilisgutanan sama sa common running errors sa recreational runners, running posture, tools, drills and Skills ug formula for speed.

Gihan-ay sa RUNNR, ang unang session sa duha ka adlaw nga clinic karong Marso 5 gikan sa alas-6 hangtod sa alas-8 sa gabii., samtang ang ikaduhang session sa Marso 6 gikan sa ala-1 hangtod sa alas-3 sa hapon.

Ang New Jersey-based triathlete makatulo na nga nakampiyon sa Philippine triathlon (2000, 2005 ug 2006) ug 6-time World Ironman Championship finisher lakip na sa iyang pagdagan sa 1998 Hawaii Ironman World Championship diin siya nahimo nga labing unang Pinoy nga nisalmot ug nitapos sa lumba.

Dugang pa niini, si Macasieb nidaog sab og duha ka bronze medals alang sa Pilipinas sa triathlon niadtong 2005 ug 2007 SEA Games.

Usa sa katuyoan ni Macasieb mao ang pagtabang ug ingon pagpalambo sa triathlon ug speed skating sa Estados Unidos ug dinhi sa Pilipinas.

Mao kini ang ikaduhang higayon ni Macasieb nga mopahigayon og running clinic dinhi sa nasud. Una niadtong Agosto sa miaging tuig didto sa Bonifacio High Street sa Pasig City.

Alang sa dugang pang mga kasayoran sa maong clinic, mahimong mokontak sa RUNNR Ayala sa numero 505-2883.    (BANATNEWS)