Phantom B mikulit sa ika-upat nilang daog sa SK-FDH cagefest

CEBU, Philippines - Milapad og maayo ang kahigayonan sa Phantom B nga moabante sa playoffs human nila gipilde ang San Miguel B, 110-98 sa SK-FDH basketball tournament diha sa Mayor’s Barangay Satellite Complex sa Barangay Lorega San Miguel, ning siyudad.

Ang Phantom mirehistro sa ikaupat nilang daog sud sa lima ka duwa aron motungtong sa ikatulong dapit sa north division. Si Juanito Reyes mipabuto og 25 puntos aron pangulohan ang Phantom B, gisundan ni Joel Fontanar sa iyang 24 puntos ug Michael Codilla nga adunay 21 puntos.

Ang San Miguel gipangulohan sab ni Wilfredo Cueva sa iyang 36 puntos, samtang si Francis Rafols mitira og 22 puntos ug si Ronald Codilla midugang og 18 puntos.

Sa laing duwa, midaog sab ang Sereas batok sa Echavez, 109-99. Si Ricky Garcia mipabuto og 38 puntos ug si Lemuel Lucero mibugwak og 27 puntos alang sa kadaugan sa Sereas.

Sila si Alfonso ug Eugene Del Mar nagkumboya og 54 puntos ug si Emeritus Amacna miamot og 12 puntos alang sa naparot nga Echavez.   (BANATNEWS)